ოზურგეთის სამოქალაქო რეესტრის უფროსი, ნატო აროშიძე თანამდებობიდან დღეს გადააყენეს. ამ წუთებში ოზურგეთის იუსტიციის სახლში, ახალსა და ძველ უფროსებს შორის დოკუმენტაციების გადაბარება მიმდინარეობს.

ამის შესახებ ინფორმაცია "ნიუპოსტს" ოზურგეთის იუსტიციის სახლიდან მიაწოდეს.

აროშიძის განთავისუფლების მიზეზი სავარაუდოდ, ერთბაშად რამდენიმე საქმე გახდა.

პირველი: გეგეჭკორების საქმე - ოჯახი ფირმა "გულისტანს" საკუთარი საკარმიდამო ნაკვეთისა და სამოსახლოს მითვისებაში ედავება, ნატო აროშიძეს კი საბუთებისა და დოკუმენტაციების გაყალბებაში ადანაშაულებს.

მეორე: აროშიძემ რამდენიმე დღის წინ ჟურნალისტს საჯარო სივრცეში გადაღების უფლება სწორედ იმ მომენტში აუკრძალა და კამერის გამორთვა მოსთხოვა, როდესაც მასთან მისული მოქალაქეები, პასუხს სწორედ გაყალბებული საბუთების გამო სთხოვდნენ. აროშიძე მომხდარი ფაქტიდან მეორე დღესვე დედაქალაქში დაიბარეს.

თავად გეგეჭკორები აცხადებენ, რომ ახლა ოზურგეთის პროკურორის მალხაზ სირაძის გადაყენების ჯერია, რადგან აროშიძესთან ერთად დოკუმენტაციას და შესაბამისად გამოძიებას ისიც აყალბებდა.

აროშიძის შემცვლელად ჩოხატაურელი დავით ჟღენტი სახელდება.

თეა იოსელიანი - გურია