რას ამბობს მინისტრთა კაბინეტი ღარიბაშვილის შესაძლო სკანდალზე

პოლიტიკა - 13:15, 14 May, 2015

4489

მმართველ გუნდში კომენტარს არ აკეთებენ მედიაში გავრცელებულ ინფორმაციაზე, რომლის თანახმად ირაკლი ღარიბაშვილმა მოლდოველ კოლეგას მოუწოდა, რომ მიხეილ სააკაშვილს არ უმასპინძლოს ქვეყანაში.

განათლების მინისტრის თქმით, აღნიშნულთან დაკავშირებით ინფორმაცია არ აქვს.

„ვერ გავაკეთებ ამაზე კომენტარს, რადგან არ ვიცნობ არც განცხადების შინაარს და შესაბამისად კომპეტენტური არ იქნება ჩემი განცხადება“, - განაცხადა სანიკიძემ.

საკითხზე ინფორმირებული არ არის ასევე გარემოს დაცვის მინისტრი გიგლა აგულაშვილი და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე.

„მხოლოდ ის ინფორმაცია მაქვს მეც, რაც მედიით გავრცელდა“, - აღნიშნა ბაქრაძემ.

მედიაში გავრცელებული ინფორმაციის თანახმად, საქართველოს პრემიერ-მინისტრმა მოლდოვას მთავრობის მეთაურისგან მოითხოვა, არ შედგეს მოლდოვაში მიხეილ სააკაშვილის ვიზიტი და მოლდოვამ არ მიიღოს რეფორმებში სააკაშვილის დახმარება. მოგვიანებით პრემიერის პრესსამსახურმა გაავრცელა განცხადება, სადაც ნათქვამი იყო, რომ ირაკლი ღარიბაშვილსა და მოლდოვას პრემიერ–მინისტრს, კირილ გაბურიჩს შორის დღეს სატელეფონო საუბარი შედგა.

ინფორმაციის თანახმად მხარეებმა საქართველოს მთავრობის მეთაურის დაგეგმილი ვიზიტის დეტალები განიხილეს და ორ ქვეყანას შორის არსებული მეგობრული და პარტნიორული ურთიერთობების გაღრმავების პერსპექტივებზე ისაუბრეს.