„გია სალუქვაძე გურიის გუბერნატორად ბიძინა ივანიშვილმა გოგა ხაინდრავას რეკომენდაციით დანიშნა"-ეს განცხადება ამ წუთებში 'ნაციონალური მოძრაობის" ლანჩხუთისა და ოზურგეთის ორგანიზაციების ხელმძღვანელებმა დავით მჟავანაძემ და კახა ასკურავამ განაცხადეს.

მათივე განმარტებით, სალუქვაძე აქ არანაირი ინფრასტრუქტურული პროექტების განსახორციელებლად და გურიის განვითარებაზე საზრუნავად, არამედ კონკრეტული მისიითა ჩამოსული, რაც 'ნაციონალური მოძრაობის" წინააღმდეგ მიმართულ ქმედებებს უკავშირდება-ითქვა პრესკონფერენციაზე.

„ყოველივე ამის ფონზე ქვეყნის უუნარო მმართველმა გურიის გუბერნატორის პოსტზე, ნაცვლად კრეატიულად მოაზროვნე კადრისა, რომლის მიზანიც იქნებოდა რეგიონში საინვესტიციო პროექტების, ინფრასტრუქტურის, და მძიმე სოციალური ფონის გაუმჯობესება, დანიშნა წარსულში პოლიციელის ცემისთვის ნასამართლევი პირი რომელიც იმ გაუაზრებელი საყოველთაო ამინისტიის შედეგად იქნა განთავისუფლებული რომლის ირგვლივაც უამრავი კითხვის ნიშანი არსებობს.

ასევე, აღსანიშნავია ის ფაქტიც რომ, გურიის გუბერნატორმა თანამდებობაზე დანიშვნამდე საზოგადოებას თავი დაამახსოვრა განსხვავებული შეხედულებების მქონე პოლიტიკური ძალების დევნით, რისი ნათელი მაგალითც არის, რამოდენიმე ხნის უკან ძალადობის შემცველი ფილმის ჩვენებაზე არასრულწლოვნების ორგანიზებულად მიყვანა.

"ერთიანი ნაციონალური მოძრაობა" გურიის გუბერნატორის პოსტზე გია სალუქვაძის დანიშვნას მკვეთრად ნეგატიურ მოვლენად მიიჩნევს და ვფიქრობთ, რომ ხელისუფლების მხრიდან მსგავსი მავნებლური გადაწყვეტილება ხელს არ შეუწყობს რეგიონის განვითარებას და მის პერსპექტივას"-აღნიშნა მჟავანაძემ.

თეა იოსელიანი - გურია