საგარეო უწყების სპიკერის დავით კერესელიძის ინფორმაციით, ავსტრიაში, მდინარე დუნაიში დამხრჩვალი გოგონა, სავარაუდოდ 29 აპრილს გაუჩინარებული ქართველი ახალგაზრდაა.

ამის შესახებ კერესელიძემ დღეს გამრთულ ბრიფინგზე განაცხადა და აღნიშნა, რომ გარდაცვლილის სახელი და გვარი ცნობილია. უწყების სპიკერმა მომხდარის გამო მწუხარება გამოთქვა.

„გარდაცვლილის სახელი და გვარი ცნობილია. საკონსულომ ავსტრიის შესაბამის ორგანოებს გუშინ თითის ანაბეჭდები იდენტიფიცირებისათვის გადაუგზავნა. პარალელურად მიმდინარეობს პროცედურები, რომელიც შემდეგ გვამის გადმოსვენებისთვის იქნება საჭირო“, - განაცხადა კერესელიძემ.

გუშინ გავრცელდა ინფორმაცია, რომ ავსტრიის ქალაქ გრაინთან ახლოს მდინარე დუნაიში გარდაცვლილი ქართველი გოგონას ცხედარი იპოვეს. არსებული ინფორმაციით, სოფო ლოლაშვილი Au-pair-ის პროგრამით მუშაობდა. გავრცელებული ინფორმაციით, იგი მდინარეში დაიხრჩო.

ავსტრიული გამოცემა წერს, რომ სოფიკო ლოლაშვილმა ვენაში ოჯახი, სადაც ის ოპერად მუშაობდა, 29 აპრილს დღის მეორე ნახევარში დატოვა. გოგონა მატარებლით გაემგზავრა, სადაც ის გერმანული ენის კურსებს უნდა დასწრებოდა. თუმცა გოგონა ადგილზე არ მისულა. მისი ბოლო ადგილსამყოფელი გრაინში, 18:00 საათზე ფიქსირდება.