გიორგი მარგველაშვილმა დონალდ ტუსკი საქართველოში მოიწვია

პოლიტიკა - 18:41, 12 May, 2015

1009

საქართველოს პრეზიდენტმა ბრიუსელში პირველი სამუშაო ვიზიტი დაასრულა. ბოლო შეხვედრა გიორგი მარგველაშვილმა ევროპული საბჭოს პრეზიდენტთან დონალდ ტუსკთან გამართა. შეხვედრის დასრულების შემდეგ ლიდერებმა მედიასთან ერთობლივი განცხადებები გააკეთეს. საქართველოს პრეზიდენტმა ევროპული საბჭოს პრეზიდენტი დონალდ ტუსკი საქართველოში მოიწვია.

შეხვედრის მთავარი თემა ევროკავშირისა და საქართველოს ორმხრივი ურთიერთობის დღის წესრიგის პრიორიტეტები და აღმოსავლეთ პარტნიორობის რიგის სამიტთან დაკავშირებული მოლოდინები იყო. როგორც გიორგი მარგველაშვილმა შეხვედრისას განაცხადა, საქართველო მზად არის საკუთარი წვლილი შეიტანოს სამიტის წარმატებაში კონკრეტული შედეგების დემონსტრირებით. საუბარი ასევე შეეხო ვიზა-ლიბერალიზაციის მნიშვნელობას საქართველო-ევროკავშირის ურთიერთობაში. საუბრისას განსაკუთრებული ყურადღება დაეთმო ევროკავშირთან ასოცირების შეთანხმებისა და ღრმა და ყოვლისმომცველი თავისუფალი სავაჭრო სივრცის შესახებ ხელშეკრულების ეფექტიანი იმპლემენტაციის მნიშვნელობას. გიორგი მარგველაშვილმა და დონალდ ტუსკმა კიდევ ერთხელ დაადასტურეს რუსეთის ფედერაციასა და სოხუმისა და ცხინვალის საოკუპაციო რეჟიმებს შორის გაფორმებული ე.წ. „მოკავშირეობისა და ინტეგრაციის შესახებ ხელშეკრულებების“ სრული მიუღებლობა.

მხარეებმა ერთმანეთს გაუზიარეს შეხედულებები რეგიონსა და საქართველოში უსაფრთხოებასთან დაკავშირებულ გარემოზე, ასევე იმ მნიშვნელოვან როლზე, რომელსაც ევროკავშირი არსებულ გამოწვევებთან ბრძოლის კუთხით ასრულებს. განსაკუთრებული ყურადღება დაეთმო საქართველოს ოკუპირებულ ტერიტორიებზე არსებულ მდგომარეობას.

საქართველოს პრეზიდენტმა კიდევ ერთხელ გამოთქვა შეშფოთება უკრაინის კრიზისის გამო და აღნიშნა, რომ უკრაინაში განვითარებული მოვლენები არის რუსეთის აგრესიული პოლიტიკის გაგრძელება, რომელიც 2008 წლის აგვისტოში, საქართველოს წინააღმდეგ ომით დაიწყო.

საქართველოს პრეზიდენტმა ევროპული საბჭოს პრეზიდენტს კიდევ ერთხელ დაუდასტურა, რომ საქართველოს ევროპული და ევროატლანტიკური ინტეგრაციის პროცესი შეუქცევადია და ის ქართველი ხალხის ეროვნულ და ისტორიულ არჩევანს წარმოადგენს.