"საქართველო მსოფლიოს საინვესტიციო რუკაზე ბრუნდება"

"საქართველო მსოფლიოს საინვესტიციო რუკაზე ბრუნდება" - ბიზნესმენები EBRD-ის შესახებ

პოლიტიკა - 11:47, 12 May, 2015

1305

EBRD-ის ყოველწლიური შეხვედრის დაწყებამდე, მის მნიშვნელობაზე ბიზნესისა და სახელისუფლო სტრუქტურების წარმომადგენლები საუბრობენ. მათი თვალსაზრისით, ეს შეხვედრა არის კარგი საშუალება ქვეყნის საინვესტიციო პოტენციალის მაქსიმალურად წარმოჩენისთვის.
საერთაშორისო სავაჭრო პალატის თავმჯდომარე - ფადი ასლის თვალსაზრისით, EBRD-ის ჩამოსვლის შედეგად, საქართველო ყურადღების ცენტრში მოექცევა და მსოფლიოს საინვესტიციო რუკაზე დაბრუნდება.
„საქართველო მსოფლიოს საინვესტიციო რუკაზე ბრუნდება, ეს EBRD -ის დამსახურებაა და ამისთვის მადლობას ვუხდით, აქ ბევრი მინისტრი, ბანკირი, ბიზნესსმენი ჩამოვა და საქართველო ყურადღების ცენტრში მოექცევა“ - აღნიშნა ფადი ასლიმ.
„თიბისი“ ბანკის გენერალური დირექტორის - ვახტანგ ბუცხრიკიძის თვალსაზრისით, ამ შეხვედრის შემდეგ უცხოელ ინვესტორებს გაუადვილდებათ გადაწყვეტილების მიღება საქართველოში ინვესტიციების დაბანდების შესახებ.„ღონისძიებაში 3000-ზე მეტი უცხოელი სტუმარი, ექსპერტი და ბიზნესმენი მიიღებს მონაწილეობას, ვფიქრობ ეს არის კარგი ნაბიჯი, რომ მათ გაუადვილდეთ გადაწყვეტილება - განახორციელონ ინვესტიციები ჩვენს ქვეყანაში“- განაცხადა ვახტანგ ბუცხრიკიძემ.
EBRD-ის შეხვედრას დიდმნიშვნელოვნად აფასებს ეკონომიკის მინისტრის მოადგილე - მიხეილ ჯანელიძეც.
"ვფიქრობთ ეს არის კარგი შესაძლებლობა რომ მოვახდინოთ საინვესტიციო შესაძლებლობების წარდგენა ფართო საზოგადოებაში და გამოვიწვიოთ მეტი ინტერესი საქართველოში ბიზნესის კეთების კუთხით" - აღნიშნა ჯანელიძემ.
შეგახსენებთ, რომ ევროპის რეკონსტრუქციისა და განვითარების ბანკის (EBRD-ის) ბიზნესფორუმი, 13-15 მაისს გაიმართება.

რუსუდან ქიმერიძე