კულტურის მინისტრის ინიციატივას, საპარლამენტო უმრავლესობა იზიარებს

პოლიტიკა - 10:58, 12 May, 2015

973

კულტურის მინისტრის - მიხეილ გიორგაძის ინიციატივას, გასვლითი ღონისძიებების დროს რეგულაციების დაწესების შესახებ, პარლამენტის უმრავლესობის წევრებიც იზიარებენ.
პარლამენტის ადამიანის უფლებათა დაცვის და სამოქალაქო ინტეგრაციის კომიტეტის თავმჯდომარე - ეკა ბესელია, აღნიშნული ინიციატივას მხარს უჭერს და აუცილებლად მიიჩნევს.
„ამ კონკრეტულმა უბედურებამ და მძიმე შემთხვევამ დღის წესრიგში დააყენა აუცილებლობა რომ არ შეიძლება არ არსებობდეს რაიმე ტიპის რეგულაციები, რომელიც იქნება დაკავშირებული ბავშების კულტურული ღონისძებების უსაფრთხოებასთან, გაყვანის დროს"- აღნიშნა ეკა ბესელიამ.
პარლამენტის ფრაქცია „ქართული ოცნების“ თავმჯდომარე - გიორგი ვოლსკი კი თვლის, რომ უსაფრთხოების თემები ყველა აქტივობაში მკაცრად უნდა იყოს დაცული.
"არა მარტო გასტროლებთან დაკავშირებით, საერთოდ უსაფრთხოების თემები უნდა იყოს ერთ-ერთი საგანგებო და მნიშვნელოვანი ყველა საზოგადოებრივ თავშეყრის ადგილზე“- განაცხადა გიორგი ვოლსკიმ.
შეგახსენებთ, ქობულეთში მომხდარი ტრაგედიის შემდეგ, რომელსაც სამი მოზარდის სიცოცხლე შეეწირა, კულტურის მინისტრმა - მიხეილ გიორგაძემ წამოაყენა ინიციატივა, რომელიც გასვლითი ღონისძიებებისთვის სამუშაო ჯგუფის შექმნას გულისხმობს, რომლის მიხედვითაც შემუშავდება სპეციალური რეგულაციები, თუ რა წესების დაცვით უნდა მოხდეს ბავშვების, არასრულწლოვნების გასტროლზე, სპორტულ შეკრებებსა და სკოლის ექსკურსიებზე წაყვანა და სასტუმროებში დაბინავება.

რუსუდან ქიმერიძე