კულტურის მინისტრის ინიციატივას, სხვა უწყებებიც უერთდებიან

პოლიტიკა - 10:28, 12 May, 2015

971

კულტურის მინისტრის - მიხეილ გიორგაძის ინიციატივას, სხვა უწყებებიც უერთდებიან. აღნიშნული ინიციატივა, გასვლითი ღონისძიებებისთვის სამუშაო ჯგუფის შექმნას გულისხმობს, რომლის მიხედვითაც შემუშავდება სპეციალური რეგულაციები, თუ რა წესების დაცვით უნდა მოხდეს ბავშვების, არასრულწლოვნების გასტროლზე, სპორტულ შეკრებებსა და სკოლის ექსკურსიებზე წაყვანა და სასტუმროებში დაბინავება.
მიხეილ გიორგაძის განმარტებით, არასრულწლოვანთა უსაფრთხოების დაცვისთვის საჭიროა კომპლექსური მუშაობა და ამ ინიციატივის განხორციელებისთვის შესაბამისი უწყებების ერთობლივი მუშაობა.

"მე ვფიქრობ ეს არ უნდა ეხებოდეს მხოლოდ გასტროლებს და შემოქმედებით კოლექტივებს, უახლოეს დღეებში მივაღწევთ ამ შეთანხმებას, როგორც მინიმუმ იურიდიული დეპარტამენტები უნდა იყვნენ ჩართულები, არ გამოვრიცხავ სხვა სამინისტროების ჩართვასაც - იგივე შინაგან საქმეთა სამინისტროსი. ვფიქრობ, სამუშაო იქნება კომპლექსური, ეს არის ის, რომ კიდევ ერთხელ დაცული იყოს ჩვენი შვილების უსაფრთხოების სტანდარტი" - განაცხადა გიორგაძემ.

საქართველოს განათლებისა და მეცნიერების მინისტრის - თამარ სანიკიძის განცხაებით, მსგავსი რეგულაციების საჭიროების შემთხვევაში, განათლების სამინისტრო მზადაა შესაბამის უწყებებთან თანამშრომლობისთვის.

"ჩვენ დიდი სიამოვნებით ვითანამშრომლებთ ყველა სამინისტროსთან და გავუზიარებთ ჩვენს გამოცდილებას, რაც ნამდვილად გაგვაჩნია. ვიცით, როგორ დავგეგმოთ კომუნიკაცია და როგორ გადავამზადოთ ეს ადამიანები, თავიდან ბოლომდე ჩავერთვებით საკითხში" - აღნიშნა თამარ სანიკიძემ.

ჯგუფში აქტიურად ჩართვისთვის შეთავაზება მიიღო სპორტისა და ახალგაზრდობის საქმეთა, ჯანდაცვისა და შინაგან საქმეთა სამინისტროებმაც. სისტემის შექმნის სამუშაოებში, UNICEF-იც იქნება ჩართული.