ივანიშვილის ფულთან ასოცირებული მაჟორიტარები - ,,მათთვის უცნობია, რა არის პოლიტიკა“

პოლიტიკა - 17:27, 11 May, 2015

1521

ეროვნულ-დემოკრატიული ინსტიტუტი (NDI) საზოგადოებრივი აზრის კვლევის - „საზოგადოების განწყობა საქართველოში“ შედეგებს აქვეყნებს, რომლის მიხედვითაც ირკვევა რომ გამოკითხულთა 58%-მა, არ იცის თავისი რეგიონის მაჟორიტარი დეპუტატის ვინაობა. კითხვაზე: ვინ არის თქვენი მაჟორიტარი დეპუტატი საქართელოს პარლამენტში, მხოლოდ 34% - მა გასცა სწორი პასუხი, 7%-მა არასწორი, 58%-მა კი საერთოდ არ იცის აღნიშნულ პირთა ვინაობა. გამოკითხულთა 97%-მა დააფიქსირა, რომ 2012 წლის საპარლამენტო არჩევნების შემდეგ მათ არავინ დაკავშრებია.

კვლევის შედეგებს ,,ნიუპოსტთან“ ექსპერტი ნიკა ჩიტიძე აფასებს. ექსპერტი ამბობს, რომ შედეგი მეტყველებს იმაზე, რომ მაჟორიტარებმა გაინაღდეს რა ადგილი პარლამენტში, ნაკლებად არიან დაინტერესებულები მოსახლეობისა და უშუალო ამომრჩევლების პრობლემებით, ,,ეს ჩემი აზრით ხშირ შემთხვევაში მიუთითებს პარლამენტართა უპასუხისმგებლობაზე ამომრჩეველთა წინაშე. წინააღმდეგ შემთხვევაში, ბუნებრივია მოსახლეობას ეცოდინებოდათ თუ ვინ არიან ეს ადამიანები, თუმცა აქ კიდევ ერთი პრობლემაა, მაგალითად 2012 წლის საპარლამენტო არჩევნებისას, უბრალო მოქალაქე გვარს არ აქცევდა ყურადღებას, მხოლოდ ნომერს უყურებდა და ბევრმა მათგანმა შემოხაზა 41, მისტეს „იქსიც“, რომ ყოფილიყო შემოხაზავდა 41-ს , ვინაიდან ეს რიცხვი ასოცირდებოდა ივანიშვილის ფულებთან, ამ ყველაფრის საწყისი და საფუძველი სწორედ ეს იყო“ - ამბობს ექსპერტი.

ამასთან, ნიკა ჩიტიძე აღნიშნავს, რომ მაჟორიტარების დიდი ნაწილი საკუთარი რეგიონის მიმართ ინტერესსაც არ იჩენს. ამის მაგალითად ექსპერტს ზესტაფონის რაიონი მოჰყავს.

,,ზესტაფონის რაიონში, როდესაც მოვაჭრეებმა გარკვეული აქცია მოაწყვეს, სთხოვდნენ მაჟორიტარს, მსახიობს (შეიძლება მაგარი მსახიობია მაგრამ, რა უნდა პოლიტიკაში), რომ მიექცია მათთვის ყურადღება, რადგან მათ აირჩიეს მაჟორიტარი. მან კი განაცხადა, რომ ეს ადამიანები ნაციონალების მოსყიდულები არიან. ერთის მხრივ ეს გარკვეულწილად მოქალაქეების ბრალია, იმიტომ რომ შემოხაზეს 41 და არ დაინტერესებულან ვინ ეწერა იქ - რადგან ოცნებასთან და ივანიშვილის ფულთან ასოცირდებოდა. მეორე ამას დაემატა პარლამენტართა უპასუხისმგებლო საქმიანობა და ვინაიდან მაჟორიტართა უმრავლესობა არ არის პოლიტიკოსი, ისინი არც არიან მოსახლეობის პრობლემებით დაინტერესებულები, პოლიტიკა კი არის ბერძნული სიტყვა რაც ნიშნავს სახელმწიფოს მართვის ხელოვნებას თუმცა ეს მათთვის არ არის ცნობილი“ - ამბობს ნიკა ჩიტიძე.