თავდაცვის მინისტრმა თინა ხიდაშელმა ვაზიანის სამხედრო ბაზაზე ქართულ-ამერიკული ერთობლივი სამხედრო სწავლება შეაფასა.

მისი თქმით, სწავლება ”ღირსეული პარტნიორი” იმის დასტურია, რომ საქართველოს არ ჰყავს უბრალოდ პარტნიორი და ჰყავს გულშემატკივარი.

რაც შეეხება კითხვას, შესაძლოა თუ არა წვრთნებმა გამოიწვიოს რუსეთის გაღიზიანება ხიდაშელი პასუხობს - "რუსეთი გაღიზიანებულია იმით, რომ საქართველო საერთოდ არსებობს. ამიტომ ეს ფურცელი უნდა დავხუროთ, ეს უკვე მოცემულობაა, გავიგეთ და მნიშვნელობა არა აქვს. მე და თქვენ ეხლა, რომ ამ ენაზე ვმეტყველებთ, რომელზეც ვმეტყველებთ, ეს უკვე საკმარისი საფუძველია. ამდენი ამერიკელი სამხედრო იმყოფება ქართულ მიწაზე და ჩვენ ჯარისკაცებთან ერთად ივარჯიშებს ამ ორი კვირის განმავლობაში. ეს ტექნიკაც შესაძლებლობას მისცემს ქართველ ჯარისკაცებს, რომ უფრო მეტად, უფრო ახლოს და ინტენსიურ რეჟიმში ივარჯიშონ. რამდენიმე მიზეზით არის პრინციპულად მნიშვნელოვანი ეს წვრთნები ჩვენთვის. პირველ რიგში იმიტომ, რომ ის ადასტურებს, რომ ჩვენ არა მხოლოდ უბრალოდ პარტნიორი გვყავს, არამედ უზარმაზარი გულშემატკივარი და მეგობარი გვყავს", - განაცხადა საქართველოს თავდაცვის მინისტრმა თინა ხიდაშელმა.