პრემიერ-მინისტრის ირაკლი ღარიბაშვილის თქმით, 2008 წლის ომის შემდეგ მსოფლიოს ლიდერები მიხეილ სააკაშვილს „ხელსაც კი არ ართმევდნენ“.

ამის შესახებ ღარიბაშვილმა უმცირესობის წევრების კითხვის საპასუხოდ განაცხადა, რომელიც შეეხებოდა იმას, თუ რატომ არ გააგრძელა ხელისუფლებამ აშშ-სთან მოლაპარაკება საჰაერო თავდაცვითი სისტემის მოწოდებაზე.

„მიხეილ სააკაშვილს მსოფლიო ლიდერები ხელსაც არ ართმევდნენ, იმდენად იყო დისკრედიტებული ამ პროცესების შემდეგ. მას პრაქტიკულად აღარ ჩაესვლებოდა ამერიკაში. თუ ვინმეს აქვს ილუზია, რომ ამერიკის შეერთებული შტატების პრეზიდენტმა სააკაშვილს აღუთქვა დახმარება იარაღის მოწოდებაზე, ცდებით. ეს ილუზია თქვენთვის შეინახეთ. ჩვენ არ გვჭირდება ილუზიებით ცხოვრება“, - მიმართა პრემიერმა „ნაციონალურ მოძრაობას“.