ევროკომისიამ საქართველოს მიერ ვიზალიბერალიზაციის სამოქმედო გეგმის შესრულების ანგარიში გამოაქვეყნა

პოლიტიკა - 16:07, 08 May, 2015

1379

ევროკომისიამ საქართველოს მხრიდან ვიზალიბერალიზაციის სამოქმედო გეგმის მეორე ფაზის 15 ძირითად მოთხოვნის შესრულებასთან დაკავშირებით ანგარიში გამოაქვეყნა.

დღეს გამოქვეყნებულ ანგარიშში ამ 15 მოთხოვნას შორის „შესრულებულად“ ჩაითვალა 7 მოთხოვნა; 4 მოთხოვნა ჩაითვალა „თითქმის შესრულებულად“, ხოლო კიდევ 4 ჩაითვალა „ნაწილობრივ შესრულებულად“, ოღონდ − „შემდგომი პროგრესის კარგი პერსპექტივით“.

როგორც საქართველოში ევროკავშირის ელჩმა იანოშ ჰერმანმა დღეს გამართულ პრესკონფერენციაზე განაცხადა, ეს ანგარიში მოიცავს ძალიან დადებით შეფასებას ევროკომისიის მხრიდან იმ ძალიან მნიშვნელოვანი პროგრესის, რომელსაც საქართველომ მიაღწია ძალიან მცირე პერიოდში. ჰერმანის თქმით, ევროკომისია მიიჩნევს, რომ საქართველომ დაიცვა ის სამიზნე ამოცანები, რომელიც განსაზღვრული იყო სამოქმედო გეგმის მეორე ეტაპისთვის.

ევროკომისიის ანგარიშში აღნიშნულია, რომ საქართველოს მიერ მიღწეული პროგრესი ვიზალიბერალიზაციის სამოქმედო გეგმის 4 ბლოკის შესრულების მხრივ არის არსებითი, რაც გამოხატავს ქვეყნის მტკიცე ნებას, შეასრულოს დასახული ამოცანები. ეს არის ძალზე ფართო და მასშტაბური შრომისა და ძალისხმევის შედეგი.

ანგარიშში, ასევე, აღნიშნულია, რომ საქართველოს მიერ განხორციელებული რეფორმების ღრმა ანალიზი იძლევა საშუალებას, დავასკვნათ, რომ ოთხივე ბლოკის მიმართულებით ქვეყანაში მოქმედი საკანონმდებლო და სახელმწიფო პოლიტიკის ფორმირებასთან დაკავშირებული სისტემები, აგრეთვე, სახელმწიფოს ინსტიტუციური და ორგანიზაციული ხასიათის პრინციპები და პროცედურები, ძირითადად, შეესაბამება საუკეთესო ევროპულ და საერთაშორისო სტანდარტებს. ამდენად, კომისიამ მიიჩნია, რომ საქართველომ ფართოდ შეასრულა სავიზო რეჟიმის ლიბერალიზაციის სამოქმედო გეგმის მეორე ფაზა.

კომისიამ მიიჩნია, რომ ამ ძალზე მნიშვნელოვანი და არსებითი პროგრესის გამო, რომელსაც საქართველომ სულ რამდენიმე თვეში მიაღწია, კომისია მზად არის, დაადგინოს შემდეგი ანგარიშის გამოქვეყნების ვადა, იმ პირობით, რომ საქართველო გააგრძელებს ასეთივე სწრაფი ტემპით დარჩენილი პირობების შესრულებას. ანგარიშში მოცემულია გარკვეული რეკომენდაციები, რომელთა შესრულება შეფასებული იქნება როგორც საქართველოს მიერ სავიზო რეჟიმის ლიბერალიზაციის სამოქმედო გეგმის მეორე ეტაპის დასრულება.

კომისიის შემდეგი ანგარიში 2015 წლის ბოლომდე მომზადდება.