"კაბელების საქმეზე არაფერს არ ვგეგმავ, ჩემი საქმე არაა... "რუსთავი-2" ოცნებობს ამაზე"- ხიდაშელი

პოლიტიკა - 13:55, 08 May, 2015

1422

„თავისუფალი დემოკრატების“ ლიდერის განცხადებას იმასთან დაკავშირებით, რომ ე.წ კაბელების საქმე პოლიტიკური თემაა, თავდაცვის ახალი მინისტრი თინა ხიდაშელი გამოეხმაურა. თავდაცვის უწყების ხელმძღვანელის განცხადებით ის ამ საქმეში ჩარევას არ გეგმავს და თუმცა ხიდაშელი სამართალდამცავებს მოუწოდებს საქმე შეძლებისდაგვარად სწრაფად დაასრულონ, რათა ჯარის გარშემო ამ ტიპის აჟიოტაჟი რაც შეიძლება სწრაფად დასრულდეს:

"ირაკლი ალასანაის განცხადებაში ახალი რა არის? ე.წ. კაბელების საქმეზე არაფერს არ ვგეგმავ და ვერც ვერაფერს დავგეგმავ. ღმერთმა დაგვიფაროს, რომ იმ საქართველოში დავბრუნდეთ, სადაც თავდაცვის ან რომელიმე სხვა მინისტრები რომელიმე სისხლის სამართლის საქმეზე რამეს გეგმავდნენ. მიუხედავად იმისა, რომ დარწმუნებული ვარ, "რუსთავი-2" ოცნებობს ამაზე, იქედან გამომდინარე, რასაც ჩვენ ვუყურებთ ქართული ჯარისკაცების წინააღმდეგ, არაფერს არ ვგეგმავ, არ დავგეგმავ. ეს არ არის ჩემი საქმე. საქმე პროკურატურაშია, სასამართლოშია. ერთადერთი მინდა, მივმართო სამართლადამცველებს, რაც შეიძლება სწრაფად დაასრულონ ამ საქმის გამოძიება, სასამართლომ რაც შეიძლება სწრაფად დაასრულოს პროცესი და პროცედურები, რათა ჯარის გარშემო ამ ტიპის აჟიოტაჟი რაც შეიძლება სწრაფად დასრულდეს. სხვას არაფერს გავაკეთებ ამ მიმართულებით, რადგან ეს არის ყველაზე მთავარი, რაც განგვასხვავებს ჩვენ იმ საქართველოსგან, რომელიც 1-ელ ოქტომბერს დასრულდა", -განაცხადა ხიდაშელმა.