სასამართლომ არასაპარლამენტო ოპოზიციის წევრების დაკავება უკანონოდ სცნო

პოლიტიკა - 11:53, 08 May, 2015

952

2015 წლის 7 მაისს თბილისის საქალაქო სასამართლომ გამოაცხადა გადაწყვეტილება, 2015 წლის 29 აპრილს და 1 მაისს დაკავებული „თავისუფალი საქართველოს“ ლიდერების კახა კუკავას და ბეჟან გუნავას, აგრეთვე 29 აპრილს დაკავებული „რეფორმატორების“ ლიდერების - ირაკლი ღლონტის და ნიკა კირვალიძის საქმეებზე სასამართლომ საქმის წარმოება შეწყვიტა.
როგორც „ნიუპოსტს“ პარტია „თავისუფალი საქართველოს“ პრესცენტრიდან აცნობეს, კუკავას, ღლონტის და კირვალიძის მიმართ დარღვევის არარსებობის გამო, ხოლო გუნავას მიმართ შეწყდა საქმე წინააღმდეგობის გაწევის ნაწილში, ხოლო წვრილმანი ხულიგნობის ნაწილში გამოტანილ იქნა სიტყვიერი შენიშვნა.
„თავისუფალი საქართველო“ აქციის მონაწილეების დაკავებასა და შემდეგ სასამართლოს მიერ გამოტანილ განაჩენთან დაკავშირებით განცხადებას ავრცელებს:

„დაკავებული პირები მართავდნენ საპროტესტო აქციას „სიტი პარკის“ მონოპოლიის წინააღმდეგ თბილისში, აქცია დარბეულ იქნა პოლიციის მიერ, ხოლო აქციის ლიდერები დააკავეს, დაადეს ხელბორკილები და გადაიყვანეს სამარტოო საკნებში, როგორც ეს მიღებულია განსაკუთრებით მძიმე დამნაშავეების შემთხვევაში, პოლიციის ხელმძღვანელების პირდაპირი დაკვეთით გაყალბებული იქნა ადმინისტრაციული საქმის მასალები.

სასამართლოს ზ/ა გადაწყვეტილების შემდეგ „თავისუფალი საქართველო“ გეგმავს გამოიყენოს კანონიერი საშუალებები, რათა მშვიდობიანი აქციის დარბევისა და უკანონო დაკავებების შესახებ ბრძანებების გაცემისთვის დადგეს საპატრულო პოლიციის უფროსის ცინარიძის, საგამოძიებო სამსახურის უფროსის ზუზაძის, აგრეთვე ასმეთაურების ბეგიაშვილის და კახნიაშვილის პასუხისმგებლობის საკითხი.

პოლიციის ხელმძღვანელობის ქმედებები აშკარად პოლიტიკურ ხასიათს ატარებს: ბოლო 2 თვის მანძილზე „თავისუფალი საქართველოს“ ლიდერი კახა კუკავა პოლიციის მიერ 4-ჯერ იქნა დაჯარიმებული ადმინისტრაციული წესით, საიდანაც 3 შემთხვევაში უკვე გამართლდა სასამართლოს მიერ, ხოლო მე-4 საქმეზე (სადღობელაშვილთან ინციდენტი) გრძელდება განხილვა სააპელაციო სასამართლოში. იმ დროს როდესაც სულ უფრო და უფრო მეტი ფაქტი ხდება ცნობილი როცა შსს სხვადასხვა ქვედანაყოფები (მ.შ. სუს და საპატრულო პოლიცია) გამოიყენება პოლიტიკური მიზნებით, მივმართავთ საერთაშორისო და ადგილობრივ უფლებადამცველებს - შეისწავლონ პოლიციის საქმიანობის პრაქტიკა ზა შემთხვევებში და მისცენ შესაბამისი სამართლებრივი შეფასება,“-ნათქვამია „თავისუფალი საქართველოს“ მიერ გავრცელებულ განცხადებაში.