"მე ხელები მომეჭრა 2013 წლის მაისში და ამიტომაც პასუხს ვერავინ მაგებინებს"

"მე ხელები მომეჭრა 2013 წლის მაისში და ამიტომაც პასუხს ვერავინ მაგებინებს" - წულუკიანი

პოლიტიკა - 16:23, 07 May, 2015

2229

იუსტიციის მინისტრის განცხადებით, მას შემდეგ რაც პარლამენტის მიერ მიღებული კანონის თანახმად იუსიტიციის მინისტრმა მთავარ პროკურატურაზე კონტროლი დაკარგა, ის სამართლიანობის აღდგენასთან დაკავშირებულ საკითხებზე პასუხისმგებელი აღარ არის. ამასთან დაკავშირებით იუსტიციის უწყების ხელმძღვანელმა პარლამენტში ოთხი კომიტეტის გაერთიანებულ სხდომაზე ისაუბრა:

„არ ვაპირებდი ამაზე საუბარს, მაგრამ მინდა შეგახსენოთ, რომ მმართველმა გუნდმა - სამთავრობომ და საპარლამენტომ, 2013 წლის მაისში მიიღო კანონი, რომლის თანახმად, იუსტიციის მინისტრს ჩამოერთვა ყველანირი უფლებამოსილება. მანამდე კანონში არსებობდა 49-ე მუხლი, სადაც ეწერა, რომ თქვენ გქონდათ უფლება, დაგეძახათ და მოგეყვანათ იუსტიციის მინისტრი პარლამენტში და მოგეთხოვათ პასუხი. 49-ე მუხლი თქვენ შეცვალეთ და ამიკრძალეთ ის უფლება, რომ პასუხი მეგო თქვენს წინაშე პროკურატურის საქმიანობაზე. ახლა კი თქვენ მთხოვთ პასუხს და ეს ცოტა უცნაურია, ამ 49-ე მუხლში შეიტანეთ თქვენ ცვლილება და დაწერეთ, რომ საპარლამენტო კონტროლი პროკურატურაზე ხორციელდება მთავარი პროკურორის პარლამენტში დაბარებით. ამასთან, თქვენ ასევე ჩაწერეთ, რომ მე მეკრძალება, ჩავიხედო რომელიმე სისხლის სამართლის საქმეში. ამას იმიტომ შეგახსენებთ, რომ დღეს ნუ წარმოაჩენთ საზოგადოების წინაშე სიტუაციას ისე, თითქოს სამართლიანობის აღდგენა ჩემს ხელშია და მე არ ვაკეთებ. ხელები მე მომეჭრა 2013 წლის მაისში. ამის შემდეგ, სამართლიანობის აღდგენა ჩემს ხელში აღარ არის, ამიტომ ვერც ვერავინ მაგებინებს პასუხს, მითუმეტეს, პარლამენტში“ - განაცხადა წულუკიანმა.

იუსტიციის მინისტრის თქმით თავის დროზე ის აღნიშნული მუხლის შეცვლას ეწინააღმდეგებოდა, თუმცა მისი პოზიციის მხარდამჭერი მხოლოდ ორი დეპუტატი - დავით უსუფაშვილი და ნინო გოგუაძე აღმოჩნდა. მინისტრის შეფასებით კანონი, რომელიც 2013 წლის მაისში ერთსულოვნად მიიღეს, უნდა გასწორდეს, რადგან ის კონსტიუტუციას ეწინააღმდეგება.