წულუკიანი გიორგი ვაშაძეს ისევ იუსტიციის სისტემაში სამუშაოდ ეპატიჟება

პოლიტიკა - 16:18, 07 May, 2015

5668

იუსტიციის მინისტრი თეა წულუკიანი მზადაა „ნაციონალური მოძრაობის“ წევრი გიორგი ვაშაძე თავის უწყებაში დაასაქმოს და აღმოჩენილი ხარვეზების აღმოფხვრის მენეჯერად დანიშნოს. ამასთან დაკავშირებით წულუკიანმა მას შემდეგ განაცხადა, რაც საპარლამენტო უმცირესობის წევრებმა პროტესტის ნიშნად დატოვეს.

„არ შემიძლია გიორგი ვაშაძეს, რომელიც თან მირბოდა და თან კითხვებს სვამდა, პასუხი არ გავცე. მან ისაუბრა, რომ იუსტიციის მინისტრმა ბრენდ-პლატფორმა შეცვალაო. ჩვენ ბევრი ბრენდ-პლატფორმა შევცვალეთ. თუ ის ნოტარიუსების ბრენდირებას გულისხმობდა, ის მთლიანადაა შეცვლილი და დღეს საქართველოს ქუჩებში საქართველოს ნოტარიუსთა პალატის ერთ ლოგოს ხედავთ“

მისივე თქმით, თუ ვაშაძე იმ სსიპ-ს გულისხმობდა, რომელსაც თავად ხელმძღვანელობდა, ის ბრენდიც შეცვლილია, რადგანაც იუსტიციის მინისტრის მტკიცებით, უწყების ბრენდი „მოპარული“ იყო.

„მესმის, რომ ბატონი ვაშაძისთვის დღესაც არის რომაული ქალღმერთი იუსტიცია და მუზა. მუზა კი არის მისთვის იუსტიცია, მაგრამ მისი სსიპ-ის ყოფილი ბრენდიც შევცვალე, იმიტომ, რომ მათ მოპარული ბრენდი ჰქონდათ. ეს ბრენდი უნდა შეცვლილიყო. არ არის ჩემი სტილი, რომ „დავგუგლო“, ბრენდი მოვიპარო და გამოვაცხადო, რომ ეს დიდი პროგრესია“, - განმარტა იუსტიციის მინისტრმა.

„რაკი ის იუსტიციაზე რჩება მიბმული, მზად ვარ, ჩემს სისტემაში დავასაქმო. მის მიერ აშენებული ყველა ინფრასტრუქტურა პრობლემურია. მარტო თბილისის იუსტიციის სახლის სახურავიდან, ალპინისტების მეშვეობით, 15 ტონა სამშენებლო ნაგვისა და რკინის ჩამოტანა 40 ათასი ლარი დაჯდა.ვპატიჟებ მას, რომ მოვიდეს. შემიძლია დავასაქმო კიდეც მრჩევლად და იუსტიციის სახლში აღმოჩენილი ხარვეზების აღმოფხვრის მენეჯერად დავნიშნო. 3.5 მლნ-ზე მეტი მჭირდება ბიუჯეტიდან, რათა მის მიერ დატოვებული ხარვეზები გამოვასწორო, რადგან ერთი ქარი რომ დაუბერავს, სახურავი არ ჩამოიქცეს და მოქალაქე არ მოკლას“, - აღნიშნა თეა წულუკიანმა.

მისივე თქმით, ეს პრობლემა აღმოფხვრილია, თუმცა სხვა პრობლემებიც არსებობს.