ასეთი დანაშაულებისთვის ხალხს წინასწარ პატიმრობაში არ უნდა ვსვამდეთ

ასეთი დანაშაულებისთვის ხალხს წინასწარ პატიმრობაში არ უნდა ვსვამდეთ - ხიდაშელი კაბელების საქმეზე

პოლიტიკა - 16:12, 07 May, 2015

2573

თავდაცვის ახალი მინისტრი - თინა ხიდაშელი მიიჩნევს, რომ ე.წ კაბელების საქმე, პროკურატურამ და სასამართლომ, რაც შეიძლება სწრაფად უნდა გამოიძიონ და დაასრულონ. ხიდაშელმა აღნიშნა, რომ მინისტრობის და პოლიტიკური თანამდებობის გამო პროკურატურის, ან სასამართლოს საქმიანობაში ვერ ჩაერევა, თუმცა იგი არ აპირებს უწინდელი პოზიციის შეცვლას და მიიჩნევს, რომ ადამიანებს მსგავსი დანაშაულებისთვის წინასწარ პატიმრობაში არ უნდა სვამდნენ.
„ეს კითხვა მოსმენის დროს „თავისუფალ დემოკრატებს“ არ დაუსვამთ. ყოველთვის საკუთარი პრინციპებისა და ღირებულებების ერთგული ვარ, ყოველთვის იმას ვაკეთებ, რისიც მჯერა. დღესაც ვფიქრობ, რომ რაც შეიძლება სწრაფად უნდა დაასრულოს პროკურატურამ და სასამართლომ ამ საქმის წარმოება. დღეს ამაში კიდევ უფრო მეტად დაინტერესებული ვარ, ვიდრე გუშინ და გუშინწინ ვიყავი. თუკი საკითხი დადგება, დიახ, არ ვაპირებ პოზიციის შეცვლას, ოღონდ იმედი მაქვს, რომ რაზე ვლაპარაკობ, სწორად გესმით და ისეთ რამეს არ დამაბრალებთ, რაც არ მითქვამს. მინისტრი ვარ, პოლიტიკური თანამდებობის პირი ვარ და ვერ ჩავერევი ვერც პროკურატურისა და ვერც სასამართლოს საქმიანობაში. მგონია, რომ ასეთი დანაშაულებისთვის ხალხს წინასწარ პატიმრობაში არ უნდა ვსვამდეთ“ - განაცხადა ხიდაშელმა.

შეგახსენებთ, რომ თინა ხიდაშელი მინისტრის თანამდებობის დაკავებამდე, ე.წ კაბელების საქმეზე დაპატიმრებულებს თავდებში ჩაუდგა. მას შემდეგ, კი რაც ხიდაშელი თავდაცვის მინისტრის თანამდებობაზე დასახელდა , გადაცემა „რეაქციაში“ აღნიშნა, რომ როგორც თავდაცვის მინისტრი იგი ამ საქმეს არ იცნობს და არც გაიცნობს ამ პოზიციიდან.