ხომერიკის განცხადებები უზუსტობებს შეიცავს - "არდი" თემურ ხომერიკს პასუხობს

პოლიტიკა - 14:31, 06 May, 2015

1369

სადაზღვეო კომპანია „არდი“ თბილისის განვითარების ფონდის ხელმძღვანელის, თემურ ხომერიკის განცხადებას ეხმაურება და აცხადებს, რომ გაუგებარია, თუ რა კავშირშია ხომერიკის გადაყენებასთან სადაზღვეო კომპანია.

არდის“ მიერ გავრცელებულ განცხადებაში ნათქვამია, რომ თემურ ხომერიკის მიერ გაკეთებული განცხადებები ფაქტობრივ უზუსტობებს შეიცავს:

„ნიუპოსტი“ სადაზღვეო კომპანიის მიერ გავრცელებულ განცხადებას უცვლელად გთავაზობთ.

„ხშირ შემთხვევაში სახელმწიფო მოხელეები შესყიდვების სფეროში გამოვლენილი არაპროფესიონალიზმის გამართლებას კერძო კომპანიებზე გადაბრალებით ცდილობენ. ბოლო წლების განმავლობაში ეს პრობლემა განსაკუთრებით მწვავედ გამოიკვეთა, რასაც უკვე სახელმწიფოს უმაღლესი ხელისუფალი პირები და არასამთავრობო სექტორიც ღიად აფიქსირებს.

სადაზღვევო კომპანია ,,არდის“ 32 მილიონ ლარზე მეტი ზარალები აქვს ანაზღაურებული, თუმცა ჩვენი კომპანია არ ერიდება სახელმწიფო სტრუქტურებთან ღია პოლემიკაში და სამართლებრივ დავაში შესვლას, როდესაც ადგილი აქვს სახელმწიფო მოხელის მხრიდან არასამართლიან და არაკეთილსინდისიერ დამოკიდებულებას. აღნიშნულ თემებზე ,,არდი“ ძალიან აქტიურად მუშაობს როგორც ბიზნესომბუცმენთან, ასევე პრემიერ-მინისტრის ეკონომიკურ საბჭოსთან. მათი თანადგომით ,,არდიმ“ სახელმწიფო მოხელეების მხრიდან გამოვლენილიარაკეთილსინდისიერი მიდგომის გამო არაერთი საკუთარი კლიენტი - ბიზნესკომპანია გადაარჩინა გაკოტრებას.

ანალოგიური პრობლემაა თბილისის განვითარების ფონდის შემთხვევაშიც, სადაც ფონდმა ყოველგვარი სამართლებრივი საფუძვლების გარეშე, თითქოსდა ქალაქის განვითარების კონცეფციის შეცვლის მიზეზით, სამ კომპანიას გაუუქმა ყველა კონტრაქტი. რამდენიმე თვიანი დავის შემდეგ, ფონდმა ერთ-ერთ კომპანიასთან თავისი დაშვებული შეცდომა აღიარა და გაუგრძელა კონტრაქტი, მეორე კომპანიის საქმე სასამართლოში იხილება, ხოლო მესამე კომპანიასთან დაკავშირებით, სადაც ზარალი სადაო არ იყო ,,არდიმ“ ფონდს მილიონი ლარი უკვე აუნაზღაურა. თბილისის განვითარების ფონდის ხელმძღვანელის დღევანდელი განცხადება შეიცავს ფაქტობრივ უზუსტობას, რადგან სამივე კომპანიაზე მათ მიერ მოთხოვნილ საბუთებში ფიქსირდება არა 9,5 მილიონი ლარი, როგორც ამას ხომერიკი ტირაჟირებს, არამედ 4 მილიონ 900 ათასი ლარი. აქედან გამომდინარე, ჩვენთვის გაუგებარია რას ემსახურებოდა ხომერიკის მიერ დღეს გავრცელებული განცხადება ,,არდის“ შესახებ და რა კავშირშია მის შესაძლო გადაყენებასთან სადაზღვევო კომპანია.

საჭიროების შემთხვევაში აღნიშნულ საკითხთან დაკავშირებით,,არდი“ გამოთქვამს მზადყოფნას ითანამშრომლოს როგორც ზედამხედველობის სამსახურთან, ასევე ნებისმიერ დაინტერესებულ სახელმწიფო სტრუქტურასთან.

არდი მომავალშიც შეინარჩუნებს პრინციპულ პოზიციას მსგავს სიტუაციებში, რომ სახელმწიფო მოხეელებმა მეტი პასუხისმგებლობა იგრძნონ თავიანთი ფუნქციების განხორციელების პროცესში,“-ნათქვამია სადაზღვეო კომპანიის მიერ ფავრცელებულ განცხადებაში.

შეგახსენებთ, რომ თბილისის განვითარების ფონდის ხელმძღვანელმა თემურ ხომერიკმა განაცხადა, რომ კომპანია „არდს“ თბილისის განვითარების ფონდის მიმართ 9,5 მილიონი დავალიანება აქვს.