გიგლა აგულაშვილმა გარემოს დაცვის სამოქმედო სტრატეგია წარმოადგინა

პოლიტიკა - 13:54, 06 May, 2015

796

გარემოს დაცვის ახალმა მინისტრმა - გიგლა აგულაშვილმა, დღეს პირველი პრესკონფერენცია გამართა, სადაც სამომავლო გეგმებსა და სამოქმედო სტრატეგიაზე ისაუბრა.როგორც აგულაშვილმა განმარტა, ხეების მოვლის შესახებ, უკვე მომზადდა ახალი დოკუმენტი, რომელიც გადაეგზავნება სხვადასხვა მუნიციპალიტეტს და მათი აზრის გათვალისწინებით შემუშავდება საბოლოო ვარიანტი, პროცესში, დაინტერესებულ არასამთავრობო ორგანიზაციებსაც შეეძლებათ მონაწილეობის მიღება.
"ეროვნული სატყეო პროგრამის ფარგლებში, შემუშავებულ იქნა ხეების მოვლის, სხვლა-ფორმირების ერთიანი წესი, რომლის მიხედვითაც ჩვენ გვსურს დავამკვიდროთ ერთიანი სტანდარტები საქართველოს ქალაქებში ხეების მოვლასთან და ფორმირებასთან დაკავშირებით. ეს დოკუმენტი მომზადდა იმისათვის, რომ ჩვენ შევძლოთ რომ არსებული მწვანე კუნძულები და მწვანე ზოლები შევინარჩუნოთ და შევქმნათ ახალი კუნძულები, რითაც აქტიურად ვიმოქმედოთ ატომოსფერული ჯაერის ხარისხის გაუმჯობესების და ხმაურის შემცირებისათვის. ჩვენ გვსურს და ვფიქრობთ, რომ ამ პროცესში აქტიურად უნდა ჩავრთოთ ყველა დაინტერესებული პირი და პირველ რიგში დოკუმენტს, რომელიც არის საკმაოდ მოცულობითი, დავუგზავნით საქართველოს მუნიციპალიტეტებს, რომ საქართველოს მუნიციპალიტეტებმა განიხილონ იგი, საკუთარი შენიშვნებით გამოგვიგზავნონ უკან, შემდეგ ჩვენ ერთად განვიხილავთ და მივიღებთ საბოლოო ვარიანტს, მაგრამ ამ პროცესში ჩართულობას ვთავაზობთ დაინტერესებულ არასამთავრობო ორგანიზაციის წარმომადგენლებს და თითოეულ მოქალაქეს. ამ დოკუმენტს ჩვენ ხელმისაწვდომს გავხდით ყველა იმ ადამიანისთვის, ვისაც ექნება სურვილი, რომ მის განხილვაში მიიღოს მონაწილეობა, რათა დოკუმენტი იყოს საერთო კონსენსუსის შედეგი და შესაბამისად საქართველოს ყველა ქალაქში, ყველა დასახლებულ პუნქტში ეს დოკუმენტი ერთნაირად განხორციელდეს და ბევრ ადამიანს ჰქონდეს მონიტორინგის საშუალება"- განაცხადა გიგლა აგულაშვილმა.

შეგახსენებთ, გიგლა აგულაშვილი გარემოს დაცვის მინისტრის პოსტს მას შემდეგ იკავებს, რაც ირაკლი ღარიბაშვილმა მინისტრთა ახალი კაბინეტი დაასახელა. მან, ამ თანამდებობაზე, ელგუჯა ხოკრიშვილი ჩაანაცვლა.