სოხუმი 13 წლის ბავშვის გარდაცვალების ფაქტს ეხმაურება

პოლიტიკა - 11:55, 06 May, 2015

6635

აფხაზური მედია 13 წლის ირაკლი ცაავას გარდაცვალებას ეხმაურება და ოკუპირებული აფხაზეთის დე ფაქტო ჯანდაცვის სამინისტროსა და გალის რაიონის მთავარი ექიმზე გიორგი შონიაზე დაყრდნობით წერს, რომ მოზარდი არა ენგურის ხიდზე, არამედ სოფელ ხიაცხში, თანდაყოლილი ანომალიის შედეგად დაიღუპა.

"ბავშვს მსხვილი ნაწლავის თანდაყოლილი ანომალია ჰქონდა. დაბადებიდან სამ დღეში მას თბილისში ოპერაცია ჩაუტარდა. 2002 წლიდან თბილისსა და ზუგდიდში ბავშვთა ქირურგის მეთვალყურეობის ქვეშ იყო. ამასთან, აფხაზეთში ცაავების ოჯახს ექიმებისთვის 2015 წლის 4 მაისამდე არ მიუმართავს.

ოჯახმა ბრიგადა დილის 6:45-ზე გამოიძახა, გალის საავადმყოფოში ბავშვი დილის 7:30 საათზე შემოიყვანეს. პაციენტის მდგომარეობა უკიდურესად მძიმე იყო. ოპერატიულ მკურნალობას ბავშვი არ ექვემდებარებოდა. მშობლებმა გადაწყვეტილება მიიღეს, შვილი თბილისში გადაეყვანათ, თუმცა გზაში 11:55-ზე მისი მდგომარეობა დამძიმდა. რეანიმაციული ღონისძიებები 20 წუთის განმავლობაში უტარდებოდა. ექიმების ძალისხმევის მიუხედავად, ბავშვის გადარჩენა ვერ მოხერხდა", - წერს აპსნიპრესი.

შეგახსენებთ, გალის რაიონის სოფელ ბარღების მკვიდრის, 13 წლის ლევან ცაავას გარდაცვალების მიზეზი რუსი ოკუპანტების ქმედება გახდა. მოზარდი შეუძლოდ გახდა. ოჯახის წევრები შეეცადნენ, რომ სამედიცინო დახმარება სახლში აღმოეჩინათ, თუმცა ეს ვერ მოხერხდა. ამის შემდეგ მათ 13 წლის ბიჭი გალში გადაიყვანეს. გამომდინარე იქიდან, რომ გალის საავადმყოფოფში ბავშვთა რეანიმაცია არ არსებობს, ოჯახმა გადაწყვიტა ლევან ცაავა ზუგდიდში წამოეყვანათ.

ენგურის ხიდზე რუსმა ოკუპანტებმა მათ „ფე-ეს-ბეს“ ბეჭდით დამოწმებული საშვი მოსთხოვეს. სანამ ოჯახის წევრებმა საბუთები მოამზადეს, ბავშვის მდგომარეობა დამძიმდა. მას შემდეგ, რაც ცაავების ოჯახმა საშვი მოიტანა, მესაზღვრეებმა ცალკე მოითხოვეს ბავშვის საშვი. ამის გამო ოჯახმა გადაწყვიტა, მოზარდი ზუგდიდში შემოვლითი გზით წამოეყვანათ. თუმცა გზაში ლევან ცაავა გარდაიცვალა.