ეკონომიკური პრობლემების სათავე მინისტრები არ არიან

ეკონომიკური პრობლემების სათავე მინისტრები არ არიან - დავით უსუფაშვილი

პოლიტიკა - 10:43, 06 May, 2015

1131

საქართველოს პარლამენტის თავმჯდომარემ, დავით უსუფაშვილმა, ტელეკომპანია „იმედის“ ეთერში ეკონომიკურ პრობლემებზე ისაუბრა და აღნიშნა, რომ ყოველივე ამის სათავე არათუ მინისტრები, არამედ ის პრობლემებია, რომელშიც ქვეყანას უწევს ყოფნა.

„სათავეს მინისტრები არ წარმოადგენენ, სათავეს წარმოადგენს ის პრობლემები, რომელშიც უხდება ქვეყას ყოფნა. მინისტრები არიან იმისთვის, რომ ეს პრობლემები მოაგვარონ, საუკეთესო გზები ნახონ შესაძლებლობიდან გამომდინარე. სწორედ ამ საუკეთესო გზების ძიებას ახერხებს მთავრობა, გუნდი და ეს ძიება გაგრძელდება" - აღნიშნა პარლამენტის თავმჯდომარემ.

რაც შეეხება მოლოდინს ეკონომიკურ გუნდში ცვლილებებზე, უსუფაშვილის თქმით, მოლოდინი ბევრნაირი იყო - მათ შორის, კოალიციის დაშლაც, თუმცა მათ ამოცანად კვლავ ქვეყნის წინსვლა და განვითარება დგას.

"მოლოდინი ბევრნაირი იყო. მოლოდინი ისეთიც იყო, რომ ჩვენ საერთოდ სახლებში წავალთ ხვალ. ჩვენი ოპონენტები ნერვიულობენ იმაზე, რომ მოვედით ხელისუფლებაში, იმაზეც ნერვიულობენ, რომ საერთოდ ვართ ხელისუფლებაში, იმაზეც ნერვიულობენ, რომ სწორედ ამ ცვლილებებით გამოეცალა საფუძველი მათ კრიტიკას უცხოეთში, რაზეც მათ წლები და უზარმაზარი ენერგია დახარჯეს იმის დასამტკიცებლად, თითქოსდა საქართველო სადღაც სხვაგან მიდის. ეს განსაკუთრებით გააქტიურდა "თავისუფალი დემოკრატების" ოპოზიციაში წასვლის შემდეგ. ახლა მთელი ეს აშენებული ხუხულა დაენგრათ. ნერვიულობენ და თვლიან, რომ ეს ცვლილებები არ არის სწორი, ადეკვატური, რადგან თვითონვე მძიმე დღეში აღმოჩნდნენ. ჩვენი ამოცანა არის ის, რომ გავაგრძელოთ აღებული კურსი დემოკრატიზაციის, ქვეყნის წინსვლის, მათ შორის ეკონომიკური საკითხების მოგვარების, ბიზნესის განვითარების, იმ კრიზისთან გამკლავებით, რაც რეგიონშია სამხედრო, პოლიტიკური და ეკონომიკური მიმართულებებით" - განაცხადა უსუფაშვილმა.