"უბადრუკმა არსებამ დღეს რომ მანტია ეცვა და საქართველოს სახელით ლაპარაკობდა..."- უგულავა

სოც.მედია - 18:54, 05 May, 2015

4642

წინასწარ პატიმრობაში დატოვების შესახებ სასამართლოს გადაწყვეტილებას პატიმარი გიგი უგულავა სოციალურ ქსელში ეხმაურება, როგორც დედაქალაქის ყოფილი მერი აცხადებს ის საკონსტიტუციო სასამართლოს ვერდიქტს დაელოდება:
"გადავწყვიტე, სასამართლო პროცესს არ დავსწრებოდი. მეტიც, ეს განცხადება კვირას, სასამართლო პროესამდე ორი დღით ადრე დავწერე.

როდესაც ქვეყანაში ამდენი პრობლემაა, ჩემი პრობლემებით და ამ გაუფასურებული სასამართლოებით არ მინდა ხალხს კიდევ უფრო დავუმძიმო განწყობა. თან, როდესაც გადაწყვეტილება წინასწარ იცი, ნაბახუსევი, ჩაწითლებული თვალებით მოსამართლე მრევლიშვილის ფამილარული გამომეტყველების ხილვის არანაირი სურვილი არ მქონდა. ეს და რამდენიმე მოსამართლე ხომ კახეთიდან ღარიბაშვილ-თამაზაშვილის მიერ სპეციალურად იქნენ თბილისის საქალაქო სასამართლოში გადმოყვანილი, რომ ივანიშვილს აამონ და როდესაც სხვა მოსამართლე ხელს არ მოკიდებს აშკარა უკანონობას, მან, მრევლიშვილმა, ან პავლიაშვილმა ზიდონ ივანიშვილის სამართალი.

საერთოდ, სასამართლოების მიერ კონსტიტუციის და კანონის ფეხქვეშ გათელვის მიუხედავად, მე არ ვარ გაბრაზებული არც სასამართლო სისტემაზე, და არც რომელიმე კონკრეტულ, ყალბის მქმნელ მოსამართლეზე. პატიმრობაში მე კარგად დავინახე ყველა სიყალბე, რაც კი შეიძლება დაბეჩავებულმა სასამართლომ ჩაიდინოს. ახლა გაცილებით უკეთ ვიცი რა და როგორაა შესაცვლელი.

ამასთანავე, დავინახე რამოდენიმე პრინციპული ადამიანი, რაც მაძლევს იმედს, რომ სოდომის და გომორის მსგავსად, საქართველოს პროკურატურასა და სასამართლოში ყველაფერი ნოლიდან არ იქნება დასაწყები. ასე რომ, უბადრუკმა არსებამ დღეს რომ მანტია ეცვა და საქართველოს სახელით ლაპარაკობდა, არც კი იცის, თავისი უკანონო გადაწყვეტილებით, არა ჩემს დამცირებას, არამედ ჩვენს გაძლიერებას შეუწყო ხელი.

თავად მე, საკონსტიტუციო სასამართლოს ვერდიქტს დაველოდები, ხოლო საერთოდ სასამართლოებს მხოლოდ როგორც ოჯახის ნახვის, ან განცხადების გაკეთების სივრცედ გამოვიყენებ. ვფიქრობე, ეს უკეთესი ფუნქციაა, ვიდრე ის, რადაც ივანიშვილმა სასამართლო აქცია."- წერს პატიმრობაში მყოფი უგულავა.

_{ნინო ზედგენიძე}