მთავრობის ადმინისტრაცია გიორგი მარგველაშვილს თხოვნით მიმართავს, რომ მინისტრთა კაბინეტის განახლებული შემადგენლობა პარლამენტს შესაბამისი ვადის ამოწურვამდე წარუდგინოს. ამასთან დაკავშირებით მთავრობის ადმინისტრაციის უფროსმა, მაია ცქიტიშვილმა ისაუბრა და იმედი გამოთქვა, რომ პრეზიდენტის ადმინისტრაცია მომავალ კვირაში დაგეგმილ ღონისძიებებთან დაკავშირებულ გარემოებებს გაითვალისწინებს.

„მიუხედავად იმისა, რომ მთავრობა მუშაობას აგრძელებს, იქმნება გარკვეული ტექნიკური სირთულეები. მაგალითად, ახლა 4 მინისტრი – იუსტიციის, საგარეო საქმეთა, შს მინისტრები და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიზიტებით იმყოფებიან, მაგრამ მათ გრაფიკის შეცვლა მოუხდათ. ვიზიტების ნაწილი შემდეგი კვირისთვის გადაიდო. 9 მაისს საზეიმო ღონისძიებებია დაგეგმილი ფაშიზმზე გამარჯვების 70 წლისთავთან დაკავშირებით, ასევე 9 მაისს ჩამოდის EBRD-ის პრეზიდენტი, 10 მაისს კი ამ ფორუმთან დაკავშირებული ღონისძიებების აქტიურ ფაზაში შესვლაა დაგეგმილი. აქედან გამომდინარე ვიმედოვნებთ, რომ პრეზიდენტის ადმინისტრაცია გაითვალსწინებს ამ გარემოებებს და შესაძლებელი გახდება პრეზიდენტის მხრიდან ამ ვადის გასვლამდე მთავრობის განახლებული შემადგენლობის პარლამენტისთვის გადაგზავნა", - განაცხადა მაია ცქიტიშვილმა.

მისივე ინფორმაციით, პარლამენტი მზად არის, მთავრობის განახლებულ შემადგენლობას, როგორც საკომიტეტო, ისე პლენარული სესიის ფორმატში 7 და 8 მაისს მოუსმინოს.

პრეზიდენტს პარლამენტისთვის მთავრობის განახლებული შემადგენლობის წარდგენის ვადა 8 მაისს ეწურება.