ჩვენ შევიკრიბეთ, რათა ხმა მივაწვდინოთ უკრაინელებს - ჩვენ თქვენთან ვართ!

ჩვენ შევიკრიბეთ, რათა ხმა მივაწვდინოთ უკრაინელებს - ჩვენ თქვენთან ვართ! - უსუფაშვილი

პოლიტიკა - 16:08, 05 May, 2015

1182

საქართველოს პარლამენტის ინიციატივით, საბჭოთა ოკუპაციის მუზეუმში ფოტოგამოფენა გაიმართა, სახელწოდებით "დონბასი - მშვიდობა და ომი. უკრაინელი ქალები - მშვიდობა და ომი".
გამოფენას დიპლომატთა კორპუსის წარმომადგენლებთან ერთად, პარლამენტის წევრებიც ესწრებოდნენ. პარლამენტის თავმჯდომარე - დავით უსუფაშვილმა, დამსწრე საზოგადოებას სიტყვით მიმართა:

„ჩვენ დღეს შევიკრიბეთ საბჭოთა ოკუპაციის მუზეუმში, რომელიც დაარსდა იმისთვის, რომ არასდროს დაგვიწყებოდა რას ნიშნავს ოკუპაცია, მაგრამ ჩვენ აქ ასევე შევიკრიბეთ, რათა გავცნობოდით კიდევ ერთი პოსტსაბჭოური ოკუპაციის შედეგებს. აქ რამდენიმე სურათში ვხედავთ სწორედ იმას, რასაც ვხედავდით ჩვენს ქვეყანაში რამდენიმე წლის წინ. სწორედ ასე გამოიყურებოდნენ ომით შეძრწუნებული ბავშვები საქართველოში. ასე გამოიყურებოდა ყველა ის ადამიანი, რომელსაც სხვა არჩევანი არ ჰქონდა, გარდა იმისა, რომ იარაღი აეღო. ასე გამოიყურებოდნენ დედები, რომლებიც ფრონტზე წასულ შვილებს წინდებს უქსოვდნენ. მათ თვალებში ვხედავთ საყვედურს პოლიტიკოსების მიმართ, რომ ჩვენ ვერ შევძელით და თავიდან ვერ ავაცილოთ ასეთი დღეები. აქ შევიკრიბეთ იმისათვის, რათა ჩვენი ხმა მივაწდვინოთ უკრაინელ ძმებს და დებს - ჩვენ თქვენთან ვართ.
მიუხედავად იმისა, რომ ბრძოლები გრძელდება და ადამიანები დღემდე იღუპებიან, ჩვენ პარლამენტის წევრებმა, მთავრობის წარმომადგენლებმა და პოლიტიკოსებმა უნდა გავაგრძელოთ მუშაობა, რომ ეს პრობლემები მოგვარდეს. ეს არის ყველაზე მოკლე პასუხი კითხვაზე - რა უნდა საქართველოს ნატო-სა და ევროკავშირში? გვინდა, რომ ეს სურათები მხოლოდ ისტორიაში დარჩეს და აღარ განმეორდეს. ჩვენი შეხვედრა გვინდა იქცეს დამაიმედებელ მესიჯად უკრაინელებისთავის, რომ ჩვენ ერთად გავუმკლავდებით ყველა პრობლემას“, - განაცხადა დავით უსუფაშვილმა.

საბჭოთა ოკუპაციის მუზეუმში გამართულ გამოფენაზე, წარმოდგენილია პროფესიონალი ფოტოგრაფების, ჟურნალისტების, სამხედროებისა და მოხალისეების გადაღებული 60 ფოტო, რომლებშიც დონეცკში და ლუგანსკში გადაღებული მძიმე მომენტებია ასახული.

რუსუდან ქიმერიძე