აფხაზეთის ავტონომიური რესპუბლიკის ჯანდაცვის სამინისტრო 13 წლის ლევან ცაავას გარდაცვალების ფაქტს ეხმაურება.

როგორც ქეთევან ბაკურაძე ამბობს, მოზარდის საზღვარზე გადმოსვლა საშვის არქონის გამო ვერ მოხერხდა.

„ბავშვს არ ჰქონდა მოწესრიგებული საბუთები, რის გამოც მისი გატარება ცენტრალური, ენგურის ხიდიდან ვერ მოხერხდა. ოჯახს მოუწია შემოვლითი გზით ბავშვის ტრანსპორტირება. სამწუხაროდ, ამ დროს ბავშვი გარდაიცვალა. როდესაც ხიდზე გადმოსვლა ხდება, ამას შესაბამისი საშვი სჭირდება, რომელიც ადმინისტრაციამ უნდა გასცეს. როდესაც ესეთი გადაუდებელი მძიმე შემთხვევებია, საშვის გაცემა ყოვნდება, რის გამოც მსგავსი ფაქტები ხდება“, - აცხადებს ბაკურაძე.

გალის რაიონის სოფელ ბარღების მკვიდრის, 13 წლის ლევან ცაავას გარდაცვალების მიზეზი რუსი ოკუპანტების ქმედება გახდა. მოზარდი შეუძლოდ გახდა. ოჯახის წევრები შეეცადნენ, რომ სამედიცინო დახმარება სახლში აღმოეჩინათ, თუმცა ეს ვერ მოხერხდა. ამის შემდეგ მათ 13 წლის ბიჭი გალში გადაიყვანეს. გამომდინარე იქიდან, რომ გალის საავადმყოფოფში ბავშვთა რეანიმაცია არ არსებობს, ოჯახმა გადაწყვიტა ლევან ცაავა ზუგდიდში წამოეყვანათ.

ენგურის ხიდზე რუსმა ოკუპანტებმა მათ „ფე-ეს-ბეს“ ბეჭდით დამოწმებული საშვი მოსთხოვეს. სანამ ოჯახის წევრებმა საბუთები მოამზადეს, ბავშვის მდგომარეობა დამძიმდა. მას შემდეგ, რაც ცაავების ოჯახმა საშვი მოიტანა, მესაზღვრეებმა ცალკე მოითხოვეს ბავშვის საშვი. ამის გამო ოჯახმა გადაწყვიტა, მოზარდი ზუგდიდში შემოვლითი გზით წამოეყვანათ. თუმცა გზაში ლევან ცაავა გარდაიცვალა.