საკრებულოს დამოუკიდებელი დეპუტატი ალეკო ელისაშვილი ექსპრემიერის განცხადებას კიდევ ერთხელ ეხმაურება, სადაც ივანიშვილმა პანორამა თბილისთან დაკავშირებით გაკეთებული განცხადების გამო ელისაშვილი გააკრიტიკა.

ელისაშვილი სოციალურ ქსელში წერს, პანორამა თბილისი არის ერთი კაცის ახირება და ის თბილისისთვის საფრთხეს წარმოადგენს.

„ორი კვირის წინ 20/30-ზე ყოფილმა პრემიერ მინისტრმა ნაციონალების დამქაშად მომნათლა და ეს მხოლოდ იმიტომ რომ "პანორამა თბილისს" ვაკრიტიკებ. მაშინ პასუხად აქ, დავწერე რომ ლანძღვის მიუხედავად მზად ვიყავი მივსულიყავი გადაცემაში და ჩემი არგუმენტები წარმომედგინა ამ პროექტთან დაკავშირებით. ორი კვირის მანძილზე არავინ შემხმიანებია და გუშინ ჯერ ჩემი დამგმობი საბჭოთა პროპაგანდის საუკეთესო ტრადიციებით დამზადებული ფილმი გავიდა GDS-ზე და მერე მლიქვნელი, ყელმოღერებული ახალგაზრდა წამყვანი და ყოფილი პრემიერ-მინისტრი ხმაშეწყობილად მაკრიტიკებდნენ. ჩემი არგუმენტები მიგლეჯილ-მოგლეჯილი და კონტექსტიდან ამოგლეჯილი ჰქონდათ ამოწერილი და მიდი მოვდივარ, ცალკარში თამაშობდნენ. თუ ასე გაფორიაქებთ ჩემი პოზიცია და გულზე გხვდებათ ჩემი კრიტიკა დაგეძახებინეთ თქვე ოჯახაშენებულებო. იმოდონა სამარცხვინო ფილმის გადაღება და მონტაჟი არ დაგეზარათ და ჩემი ნომრის აკრეფვა ვერ მოახერხეთ? საერთო ჯამში უბრალოდ გულდასაწყვეტია რასაც პანორამა თბილისთან დაკავშირებით ვუყურებ. მეტს ველოდი ბიძინა ივანიშვილისგან, თუნდაც იმას ველოდი რომ მლიქვნელებს და კუდმოქიცინე "ექსპერტებს" თუ "ანალიტიკოსებს" ნაკლებად დაუგდებდა ყურს და კრიტიკული აზრისადმი ყურადღებით იქნებოდა განწყობილი. თუმცა ასე არ მოხდა. ამის მიუხედავად მე ჩემი მტკიცე აზრი მაქვს "პანორამა თბილისთან" დაკავშირებით და სამწუხაროდ დარწმუნებული ვარ რომ ეს უზარმაზარი პროექტი არის ერთი კაცის ახირება და საფრთხე ისტორიული თბილისისათვის. არგუმენტები ამის შესახებ მილიონჯერ მაქვს ნათქვამი, აღარ გავიმეორებ. ისე კი ყოფილი პრემიერ-მინისტრი და მის გარშემო შემოკრებილ მლიქვნელთ-გენიოსთა მთელი ინკუბატორი ქვეყნის და ხალხის რეალური პრობლემებით თუ დაკავდებოდნენ კარგი იქნებოდა. ჩემი ლანძღვის ნაცვლად ლარის კურს მიხედეთ ბატონებო გირჩევთ. სანამ თქვენ უაზრო პროპაგანდისტულ ფილმებს იღებთ მეც და დანარჩენი ისედაც ღარიბი ქართული ოჯახები თვიდან თვემდე ვღარიბდებით. საქმით დაკავდით, ხალხზე იფიქრეთ და რეალური პრობლემები მოაგვარეთ - ჩემ ეს ფრაზები ყელმოღერებულმა მაამებელმა არჩილმა როგორც უნდა ისე ამოკრიფოს და ხმამაღლა წაიკითხოს ეთერში - ამის წინააღმდეგი არ ვიქნები ნამდვილად“, - წერს ელისაშვილი.