პრეზიდენტი წულუკიანს: ხანდახან გინდა ადამიანს დააბრალო ის, რაც სიმართლე არ არის

პოლიტიკა - 22:40, 01 May, 2015

3135

გიორგი მარგველაშვილმა თეა წულუკიანის განცხადებას ,,რეაქციის" ეთერში უპასუხა. მისი თქმით, მინისტრები ასრულებენ მოვალეობას და მათ საქმიანობაზე პრეზიდენტის მიერ მიღებული გადაწყვეტილება გავლენას ვერ მოახდენს. გიორგი მარგველაშვილის თქმით, მისთვის უცნობია, რომელიმე მინისტრის საქმიანი ვიზიტი რეალურად გადაიდო თუ არა.

„ყველა მინისტრი ასრულებს საკუთარ მოვალეობას. მეტიც, მე არ ვიცი, რომელიმე მინისტრის ვიზიტი მართლა გადაიდო თუ არა. თუ ისინი მინისტრები არიან და დაუმტკიცებელი მინისტრებიც თუ მინისტრები არიან, რა სირთულეს წარმოადგენს და რა საჭიროა მსგავსი განცხადებები. მე მესმის რომ ემოციურობა ხანდახან პლევარილებს ხოლმე და ხანდახან გინდა ადამიანს დააბრალო ის, რაც თვითონაც იცი, რომ სიმართლე არ არის. ფაქტია, რომ ჩვენი მინისტრები ასრულებენ თავიანთ მოვალეობას და მათ არანაირად არ ეშლებათ ხელი საქმიანობის შესრულებაში. რა საჭიროა იმის მოგონება, რომ რიგის სამიტის წინ რაღაც პრობლემა შეიქმნა. ყველა მინისტრი არის ლეგიტიმური და ყველა ასრულებს მოვალეობას,“-განაცხადა გიორგი მარგველაშვილმა.

შეგახსენებთ, რომ თეა წულუკიანმა გიორგი მარგველაშვილის მიერ ახალი მინისტრების პარლამენტში წარდგენის ერთი კვირით გადადებასთან დაკავშირებით განაცხადა, რომ ამ გადაწყვეტილებამ მინისტრებს რიგის სამიტის წინ გარკვეული პრობლემები შეუქმნათ.