განათლების სამინისტრო ხელნაწერთა ეროვნული ცენტრის ხელმძღვანელს არაკონსტრუქციულ ქმედებებში ადანაშაულებს.

აღნიშნულთან დაკავშირებით უწყება განცხადებას ავრცელებს.

„საქართველოს განათლებისა და მეცნიერების სამინისტროს შიდა აუდიტის დეპარტამენტმა დაასრულა სსიპ ხელნაწერთა ეროვნული ცენტრის ანგარიშის პროექტზე მუშაობა, რომელიც განსახილველად ცენტრს უკვე გადაეგზავნა. კანონმდებლობით დადგენილი პროცედურების თანახმად, ცენტრმა 10 დღის განამვლობაში უნდა წარმოადგინოს აუდიტის ანგარიშზე მოსაზრებები, რის შემდეგაც მოხდება საბოლოოდ შეჯერებული და დამტკიცებული ანგარიშის გასაჯაროება.

ბოლო პერიოდში განვითარებული მოვლენებიდან გამომდინარე, საქართველოს განათლებისა და მეცნიერების სამინისტროსთვის სამწუხაროა ხელნაწერთა ეროვნული ცენტრის ხელმძღვანელის არაკონსტრუქციული ქმედებები და იმედს იტოვებს, რომ ცენტრსა და სამინისტროს შორის ურთიერთობა ჩვეულ რეჟიმს დროულად დაუბრუნდება.

ცალსახაა, რომ ხელნაწერთა ეროვნულ ცენტრის ფუნქციონირებაში სერიოზული ხარვეზები იკვეთება. იმ ფონზე, როდესაც ბოლო ორი წლის განმავლობაში ცენტრის ბიუჯეტი გახდა მზარდი და ამასთანავე, ცენტრს აქვს რეგულარული შემოსავალი გრანტების სახით (შემოსავლის წყარო განათლებისა და მეცნიერების სამინსიტროს სსსიპ შოთა რუსთაველის სახელობის ეროვნული სამეცნიერო ფონდია), აღნიშნული შემოსავლები არ არის რაციონალურად ასახული თანამშრომელთა ანაზღაურებაზე. მიდგომა, რომელიც ცენტრის ხელმძღვანელობას აქვს შემუშავებული სახელფასო პოლიტიკასთან დაკავშირებით, სამინისტროს მიაჩნია, რომ დაუყოვნებლივ შესაცვლელია.

აღსანიშნავია, რომ ბოლო ორი წლის განმავლობაში სამინისტრომ დაიწყო ყველა იმ პრობლემის მოგვარება, რომელიც ცენტრს წლების განმავლობაში ჰქონდა. დაფინანსდა პროექტი, რომელსაც მრავალი წლის განმავლობაში უსახსრობის გამო ცენტრი ვერ ახორციელდება. მათ შორის, სამინისტრომ დააფინანსა საერთაშორისო კონფერენცია ,,ტაო-კლარჯეთი". დაფინანსდა სინას სამეცნიერო ექსპედიცია წმინდა ეკატერინეს მონასტერში დაცული ქართული ხელნაწერების შესწავლის მიზნით. 2014 წელს, ცენტრმა მიიღო დაფინანსება პრეზიციული კონდიციონერის შეძენა-დამონტაჟების ხარჯების დასაფარად, რათა ცენტრის საცავში ხელნაწერების დაცვისთვის აუცილებელი პირობები ყოფილიყო. სამინისტრომ მხარი დაუჭირა არაერთ სხვა პროგრამას, რომელსაც წლების განმავლობაში ყურადღება არ ექცეოდა.

წლების განმავლობაში ხელნაწერთა ეროვნული ცენტრის გადაუჭრელ პრობლემას წარმოადგენდა ცენტრის საცავების მოწესრიგება თუ ახალი შენობის გამოყოფა. აღნიშნული საკითხის მოგვარება სახელმწიფომ გასულ წელს დაიწყო და პროცესი დღემდე გრძელდება.

ცენტრისა და სამინისტროს მიერ შემუშავებული ტექნიკური დავალების გათვალისწინებით, მიმდინარეობს ხელნაწერთა ეროვნული ცენტრის ინფრასტრუქტურული მოდელის დამუშავება და მისი დასრულების შემდეგ, დაიწყება პროექტირება. ცენტრის ხელმძღვანელთან ერთად სამინისტრომ განიხილა ახალი ცენტრის ასაშენებლად გამოყოფილი ტერიტორიის რამდენიმე ალტერნატივა. ტერიტორიის დასაზუსტებლად სამუშაობი ამჟამად მიმდინარეობს იმ კრიტერიუმების გათვალისწინებით, რაც უკეთესად წარმოაჩენს ხელნაწერთა ეროვნული ცენტრის ღირებულებას და ხელნაწერების საერთაშორისო სტანდარტების გათვალისწინებით დაცვას .

ყოველივე ამის ფონზე, სამინისტრო მიიჩნევს, რომ ცენტრის მხრიდან გაჟღერებული ბრალდებები უსაფუძვლოა და მრავალ კითხვას ბადებს. ამასთან, განათლების სამინისტრო ღიაა და მზად არის ნებისმიერ საკითხზე ცენტრის თანამშრომლებთან სამუშაო“, - ნათქვამია განცხადებაში.