,,მირჩევნია თავდაცვა პროდასავლური ძალის ხელში იყოს, თუმცა მინისტრის ხშირი ცვლა პოზიტიური ფაქტი არ არის“

პოლიტიკა - 15:59, 01 May, 2015

1775

მინისტრთა კაბინეტში ცვლილებებს ეხმაურება ,,ეროვნულ-დემოკრატიული პარტიის“ ლიდერი. ბაჩუკი ქარდავა ,,ნიუოპსტთან“ კომენტარში აცხადებს, რომ მთავრობის ცვლილება ფორსმაჟორულ რეჟიმში ხდება და რეალურად ქართული საზოგადოება არ არის საქმის კურსში, თუ რამ განაპირობა აღნიშნული ცვლილებები.

,,გარემოს დაცვის და სპორტის მინისტრის გადადგომა რომ არ იყო რეალური მიზეზი, ეს ფაქტია. თუ პოლიტიკური და ეკონომიკური აუცილებლობა არსებობდა იმისა, რომ მთავრობის ცვლილება განხორციელებულიყო, ჩემთვის ცოტა გაუგებარია, რას უმალავენ ქართველ ხალხს და რატომ დადგა დღის წესრიგში ასეთი სახის ცვლილებები, მაშინ როდესაც ვხედავთ, რომ მნიშვნელოვანი ცვლილება, თუ არ ჩავთვლით „რესპუბლიკელების“ მხრიდან მთავრობაში კიდევ ერთი პორტფელის მიღებას, სხვა არ მომხდარა.

რაც შეეხება თავდაცვის სამინისტროში თინა ხიდაშელის დანიშვნას, ქარდავა ,,რესპუბლიკელების“ დასავლური პოლიტიკური ორიენტირიდან გამომდინარე, პოზიტიურად მიიჩნევს. ,,ეს ჩემი სუბიექტური აზრია - ნამდვილად მირჩევნია, რომ თავდაცვის სამინისტრო დასავლური ორიენტაციის პოლიტიკური ძალის ხელში იყოს. ამიტომ ამ ტიპის პოლიტიკური ძალის თავდაცვის მინისტრად დანიშვნას კრიტიკის ქარ-ცეცხლში ნამდვილად ვერ გავატარებ“ - აცხადებს ედპ-ს ლიდერი.

ქარდავა ეთანხმება პრეზიდენტის პოზიციას და მიიჩნევს, რომ თავდაცვის უწყების ხელმღვანელის ხშირი ცვლა არ არის დადებითი იმიჯის მომტანი სახელმწიფოსთვის.

,,ვეთანხმები პრეზიდენტის განცხადებას, რომ თავდაცვის სამინისტროში ყოველთვე ხელმძღვანელის ცვლილება ქვეყანაზე პოზიტიურად არ იმოქმედებს. იმედი მაქვს, რომ ეს ცვლილება მაინც არ იქნება მოკლევადიანი, თუმცა ჩემი იმედი რწმენას არ ემყარება, რადგან ჩვენი დღევანდელი ხელისუფლების ქმედებებში გრძელვადიან სტრატეგიას ვერ ვხედავ“ - აცხადებს ქარდავა.

ამასთან, ედპ-ს ლიდერი ვარაუდობს, რომ თუკი აღნიშნული საკადრო ცვლილების უკან რეალურად დგას შანტაჟი და არა სტრატეგიული გადაწყვეტილება, შესაძლო ამ მთავრობამ დიდხანს ვერ იმუშაოს.

,,საყურადღებოა ის ფაქტიც, რომ თუ ამ ყველაფრის უკან არის ხელისუფლების რეალური მმართველის მიმართ გარკვეული პოლიტიკური შანტაჟი, უმრავლესობის დაშლის მუქარით და თავდაცვის მინისტრის შეცვლა არაა იდეური და სტრატეგიული გადაწყვეტილება და ემყარება შანტაჟს, მაშინ უნდა ველოდოთ, რომ ეს მთავრობა დიდხანს შეხმატკბილებულად ვერ იმუშავებს“ - აცხადებს ედპ-ს ლიდერი.