ივანიშვილი წარუმატებლობით შეშფოთებულია და ცვლილებებს ახორციელებს- შარაშენიძე

პოლიტიკა - 16:18, 29 Apr, 2015

2346

ექსპერტ თორნიკე შარაშენიძის აზრით სამთავრობო ცვლილებებს ბიძინა ივანიშვილი ახორციელებს, რომელიც მთავრობის წარუმატებლობით შეშფოთებულია. როგორც თორნიკე შარაშენიძემ „ნიუპოსტთან“ საუბარში აღნიშნა, თუ ცვლილება ეკონომიკურ გუნდს არ შეეხო, გამყარდება მოსაზრება, რომ ეს ცვლილებები ღარიბაშვილის შეცვლის მიზნით განხორციელდა:

„მთავრობის კრიზისი რითია გამოწვეული ამის თქმა ძნელია, რადგან მთავრობის ხელმძღვანელი, ყოველ შემთხვევაში ფორმალური, ბოლო წუთამდე ამბობს, რომ ყველაფერი არის კარგად, თუ რამე პრობლემებია გარე ფაქტორის ბრალია და ყველა მუშაობს კარგად. მეორე მხრივ თუ საღ აზრს დავეყრდნობით, ჩანს რომ ბიძინა ივანიშვილი ამ წარუმატებლობით შეშფოთებულია და ცლილებებს ახორციელებს. ცვლილებები იმ ადამიანის მოთხოვნით ხდება ვინც ქვეყანას რეალურად მართავს და ეს არის ბიძინა ივანიშვილი. საინტერესოა თუ რატომ გადაწყვიტა მან ეს ამ ეტაპზე, ამაში ლარის კურსია თუ სხვა რამე დამნაშავე არ მესმის. იმასთან დაკავშირებით, რომ ამის მიზეზი შეიძლება იყოს ივანიშვილ-ღარიბაშვილს შორის ურთიერთობის გაფუჭება, ამაზე მხოლოდ შეიძლება ვიმარჩიელოთ.“- აცხადებს შარაშენიძე.

ექსპერტი ღარიბაშვილის სავარაუდო შემცვლელზეც საუბრობს და შესაძლო ვარიანტად ნოდარ ჯავახიშვილს განიხილავს:

„ივანიშვილს ღარიბაშვილისნაირი ერთგული კადრის პოვნა გაუჭირდება, ვის იპოვის მის შემცვლელად ამაზე საუბარი რთულია, თუმცა საუბარი არის ნოდარ ჯავახიშვილზეც და როგორც ჩანს ივანიშვილი მასაც ენდობა. თუ ივანიშვილმა გადაწყვიტა, რომ შეცვალოს ღარიბაშვილი, მას ამას ვერავინ გადაათქმევინებს, ჩვენ ვიცით ამ კაცს რა ჯიუტი ხასიათი აქვს.“

თორნიკე შარაშენიძის განცხადებით, თუ ცვლილებები მთავრობის ეკონომიკური გუნდის მინისტრებს არ შეეხო, მაშინ მოსაზრება იმის შესახებ , რომ ეს მოვლენები ღარიბაშვილის შესაცვლელად განვითარდა, უფრო რეალური გახდება.

„წარუმატებლობა გვაქვს ლარში, სპორტის წარუმატებლობას მოსახლეობა თავის ჯიბეებზე ნაკლებად გრძნობს. თუ ეკონომიკური გუნდი არ შეიცვალა, მაშინ გამოდის რომ ამ ცვლილებების მიზანი მართლაც ღარიბაშვილის შეცვლაა“- აცხადებს ექსპერტი.