ვიცე-პრემიერი და ენერგეტიკის მინისტრი კახა კალაძე, მთავრობაში განხორციელებულ მოვლენებს ეხმაურება.

მინისტრის განმარტებით, მას არანაირი დაპირისპირება არ ჰქონია არც ლევან ყიფიანთან და არც ირაკლი ღარიბაშვილთან. კალაძე ვერც მინისტრთა ცვლილებაში ხედავს რაიმე განსაკუთრებულს და მიიჩნევრ რომ ეს ბუნებრივი და გარდაუვალი პროცესია. მისი თქმით, გუნდში დაპირისპირების არსებობა ოპონენტების სურვილია. ის პრემიერმინისტრის ახალკანდიდატურას არ განიხილავს.

„არანაირი დაპირისპირება არ მქონია და არ მაქვს არც ირაკლი ღარიბაშვილთან, არც ლევან ყიფიანთან. მე ძალიან კარგად მესმის, გარკვეულ ჯგუფებს, ჩვენს ოპონენტებს აქვთ სურვილი, რომ გუნდში იყოს დაპირისპირება. ჩვენ გვყავს პრემიერმინისტრი - ირაკლი ღარიბაშვილი“ - აღნიშნა კახი კალაძემ.

კალაძის თქმით, აჟიოტაჟისთვის არანაირი საფუძველი არ არსებობს, მან პარალელი ძველ ხელისუფლებასთანაც გაავლო და აღნიშნა, რომ მიუხედავად მსგავსი ცვლილებებისა, მაშინ არ იყო ვალდებულება, რომ პარლამენტს, პრემიერ-მინისტრის მიერ წარდგენილი მინისტრთა კაბინეტი დაემტკიცებინა.

„ის პროცესები, რაც ხდება, ვფიქრობ, ყველაფერი ჯანსაღია. ზოგადად, მინდა გითხრათ, რომ ამაში რაღაც გასაკვირი, გასაოცარი არაფერი ხდება. ეს ჩვეულებრივი პროცესია. ადრეც ხდებოდა მინისტრების შეცვლა. დღესაც ხდება და მომავალშიც იქნება. ეს გარდაუვალია.

ყიფიანმა ძალიან ვრცელი განცხადება გააკეთა. ვფიქრობ, რომ კითხვები არ არსებობს. გულწრფელად გეუბნებით, არანაირი აჟიოტაჟის საფუძველი არ არსებობს...თუ გავიხსენებთ წინა ხელისუფლების დროს, სამ თვეში ერთხელ ხდებოდა მინისტრების ცვლილება, მაგრამ მაშინ არ იყო ვალდებულება, რომ პარლამენტს, პრემიერ-მინისტრის მიერ წარდგენილი მინისტრთა კაბინეტი დაემტკიცებინა. დღეს სრულიად განსხვავებული რეალობა გვაქვს და ამის გამოა ეს რაღაც აჟიოტაჟი“ - განმარტა კახა კალაძემ.

შეგახსენებთ, სპორტისა და ახალგაზრდობის მინისტრმა ლევან ყიფიანმა დღეს თანამდებობა დატოვა, პარლამენტმა მთავრობას ხელახალი ნდობა უნდა გამოუცხადოს.

რუსუდან ქიმერიძე