"ახლა მთელი პასუხისმგებლობა არის პარლამენტზე"- ენმ მთავრობის გადადგომას ეხმაურება

პოლიტიკა - 13:06, 29 Apr, 2015

1321

მთავრობის გადადგომას „ნაციონალური მოძრაობა“ სპეციალური ბრიფინგით გამოეხმაურა. ბრიფინგზა განცხადება გოკა გაბაშვილმა გააკეთა და აღნიშნა, რომ ამჟამად მთელი პასუხისმგებლობა პარლამენტზეა გადასული, რათა საკანონმდებლო ორგანო გამოვიდეს ივანიშვილის ჩრდილიდან და ტექნიკური ტიპის მთავრობის დაკომპლექტება შეძლოს:

„5 კვირა გავიდა მას შემდეგ, რაც ათი ათასობით ადამიანმა თავისუფლების მოედანზე მთავრობას წითელი ბარათი უჩვენა. დღეს მთელი საზოგადოებისთვის ნათელია, რომ მთავრობა უუნარო და არაქმედითია და ამ მთავრობამ ქვეყანა ღრმა ეკონომიკურ და პოლიტიკურ კრიზისში შეიყვანა. სამწუხაროდ მთავრობას არ ეყო გამბედაობა ეღიარებინა ეს კრიზისი და გადამდგარიყო, მაგრამ როგორც ამბობენ „ჭირი თავს არ დამალავსო“ და ღარიბაშვილის მთავრობა ფაქტიურად დაიშალა. ეს დაშლა არა მხოლოდ ღარიბაშვილის მთავრობის უუნარობას, არამედ ოლიგარქ ივანიშვილის კულისებიდან მართვის სისტემურ კრახსაც გვიჩვენებს. ახლა საქართველოს პარლამენტის ამოცანაა შეასრულოს საზოგადოების დაკვეთა და დანიშნოს არა ივანიშვილის მორიგი მარიონეტული მთავრობა, არამედ გამოვიდეს ოლიგარქის ჩრდილიდან და შეძლოს ტექნიკური ტიპის მთავრობის დაკომპლექტება, რომელიც შეაჩერებს ეკონომიკის ნგრევას და ჩამოშლას და სწრაფი საკანონმდებლო ცვლილებებით ქვეყანას არჩევნებისთვის მოამზადებს. თუ საქართველოს პარლამენტი ისევ ივანიშვილის მარიონეტულ მთავრობას დაამტკიცებს კრიზისი გაგრძელდება და გაღრმავდება, ლარის გაუფასურება და მოსახლეობის გაღატაკება შეუქცევადი გახდება. ახლა მთელი პასუხისმგებლობა არის პარლამენტზე.“- განაცხადა გოკა გაბაშვილმა.