სპორტისა და ახალგაზრდობის საქმეთა მინისტრმა თანამდებობა დატოვა. ამის შესახებ ლევან ყიფიანმა საგანგებო ბრიფინგზე განაცხადა.

„სანამ გადაწყვეტილების შესახებ მოგახსენებთ გეტყვით, რომ ვერ მოხდა საიდუმლოს შენახვა ბოლომდე... ჩემი პირადი გადაწყვეტილება მინდოდა მე თვითონ მეცნობებინა საზოგადოებისთვის. ყველაფრის მიუხედავად, ბოლო დროს განვითარებული მოვლენების შემდეგ არ მინდა პოლემიკაში შევიდე სპორტის კომიტეტის წევრებთან. მათგან განსხვავებით სახელმწიფო ინტერესებს პირად ინტერესებზე მაღლა ვაყენებ. მინდა მივმართო პრეიმიერს გადადგომის თხოვნით", - განაცხადა ყიფიანმა.

ლევან ყიფიანმა გადაწყვეტილების გასაჯაროებამდე, სამინისტროს მიერ გაწეული სამუშაოსა და სპორტულ სამყაროში მიღწეული შედეგების შესახებაც ისაუბრა. რის შემდეგაც მან იმედი გამოთქვა, რომ საზოგადოება დააფასებს აღნიშნულ მიღწევებს და სწორად შეაფასებს, რადგან ეს არის რეალობა და არა ის ჭორები და ლაფის სროლა, რაც ბოლო პერიოდში იყო. ყიფიანმა მისი მინისტრად მოღვაწეობის პერიოდს "სუფთა ხელებითა და გახსნილი გულით" ნამუშევარი უწოდა.