"ღარიბაშვილის მთავრობა დამთავრდა, ივანიშვილმა საკუთარი პირმშოს დაცვა ვეღარ შეძლო"

სოც.მედია - 10:34, 29 Apr, 2015

14130

ლევან ყიფიანის გადადგომის შესახებ მედიაში გავრცელებულ ინფორმაციას საპარლამენტო უმცირესობის წევრი გივი თარგამაძე სოციალურ ქსელში ეხმაურება. „ნაციონალური მოძრაობის“ ერთ-ერთი ლიდერის განცხადებით, მათ მოახერხეს ღარიბაშვილის მთავრობის უნიათობის გამოაშკარავება.

„და აჰა, ჩვენი მოთხოვნა შესრულდა. ჩვენ კონკრეტული მაგალითებით მოვახერხეთ ღარიბაშვილის მთავრობის სრული უნიათობის, კლანურობის, კორუმპირებულობის გამოაშკარავება, რაც 21 მარტს თავისუფლების მოედანზე ათიათასობით ადამიანმა გააპროტესტა. სურათი იმდენად ცხადი გახდა და პროტესტი იმდენად მზარდი, რომ ივანიშვილმა ვეღარ შეძლო საკუთარი პირმშოს დაცვა. ღარიბაშვილის მთავრობა დამთავრდა. რა თქმა უნდა, ივანიშვილი ცდილობს, მორჩილი მთავრობის ახალი, პირად დაცვით- ქართული ვერსია დაამკვიდროს და ამიტომ ახლა უმნიშვნელოვანესია, პასუხისმგებლობიან დეპუტატთა ერთობამ არ მისცეს მას ამის საშუალება პარლამენტში, რათა შედეგად მივიღოთ პროფესიონალთაგან შემდგარი ტექნიკური მთავრობა, რომელიც გადადგამს პირველად ანტიკრიზისულ ნაბიჯებს, მოაწესრიგებს საარჩევნო კანონმდებლობას, შექმნის კონკურენტულ საარჩევნო გარემოს და მიიყვანს ქვეყანას არჩევნებამდე, რომლის შედეგადაც ივანიშვილი საბოლოოდ ჩამოცილდება ხელისუფლებას. აი მიზანი. მიღწევადია? უნდა ვიმუშაოთ და გამოჩნდება.“- წერს გივი თარგამაძე.