დღეს უზენაესი სასამართლოს თავმჯდომარემ და პრემიერ-მინისტმა სამუშაო შეხვედრა გამართეს. გვენეტაძის განცხადებით, პრემიერთან საუბარი ძირითადად სასამართლო რეფორმებს და ფინანსურ საკითხებს შეეხებოდა.

უზენაესი სასამართლოს თავმჯდომარემ აღნიშნა რომ, ფინანსურ საკითხებთან დაკავშირებით, მან პრემიერისგან მხარდაჭერა მიიღო.

„პრემიერთან ვისაუბრეთ ძირითადად სასამართლო რეფორმასთან დაკავშირებით. ის კანონპროექტი, რომელიც იუსტიციის სამინისტრომ წარადგინა მთავრობაში, არის კომპლექსური საკანონმდებლო პაკეტი, მასში არის ძირეული საკანონმდებლო ცვლილებები, საერთო სასამართლოს შესახებ ორგანულ კანონთან დაკავშირებით. ასევე, არის იუსტიციის უმაღლესი საბჭოს და იუსტიციის უმაღლესი სკოლის რეფორმირების საკითხი. ამ საკითხებთან დაკავშირებით გავცვალეთ პოზიციები.

მნიშვნელოვანი იყო ჩვენი მიმართვა პრემიერისთვის ფინანსურ საკითხებთან დაკავშირებით, რაც უკავშირდება სასამართლოს გამჭირვალობას, შენობის გაფართოებას. განსაკუთრებული აქცენტები გაკეთდა თბილისის საქალაქო სასამართლოში არსებულ პრობლემებზე, სასამართლოს ხელმისაწვდომობის საკითხებზე, მოსამართლეთა გადატვირთულობაზე, დარბაზების სიმცირეზე და ა.შ. დაისახა რიგი პერსპექტივები, რაც მომავალ შეხვედრაზე დაკონკრეტდება.

დავსვით საკითხები მოსამართლეთა რიცხვის გაზრდის შესახებ. ვისაუბრეთ მოსამართლეთა საპენსიო უზრუნველყოფაზე და კომპენსაციის საკითხებზე. ძალიან სასიხარულოა ჩემთვისაც, ზოგადად მოსამართლეთა კორპუსისთვის, რომ მისი მხრიდან მივიღეთ სრული მხარდაჭერა“, - განაცხადა გვენეტაძემ.