ექსპერტის ხათუნა ლაგაზიძის ინფორმაციით, ვლადიმერ პუტინი 2016 წლის არჩევნების წინ საქართველოსთან სავიზო მიმოსვლის გააუქმებას აპირებს. როგორც ექსპერტმა "ნიუპოსტთან" საუბრისას განაცხადა, გახსნილი რუსეთი ჩაკეტილი ევროპის ფონზე, საქართველოსთვის საკმაოდ დიდი რისკს წარმოადგენს.

„თუ ჩვენ ევროკავშირთან უვიზო მიმოსვლა მივიღეთ, ამ შემთხვევაში რუსეთმა თუნდაც გააუქმოს სავიზო რეჟიმი საქართველოსთან ეს იმდენად არ იქნება მტკივნეული და დამანგრეველი ქართული სოციუმისთვის, ხოლო თუ ჩვენ მხოლოდ რუსეთი გაგვიხსნის გზას და გააუქმებს სავიზო რეჟიმს, ეს ნიშნავს იმას რომ საქართველოს საზოგადოების უდიდესი ნაწილი იქნება რეალურად კვლავ მოწყვეტილი ევროპულ ცივილიზაციას. გასაგებია ის რომ დავუშვათ ევროკავშრთან და ნატოსთან ინტეგრაცია დროში გადაიდო, მაგრამ მთავარი პრობლემა არის ის, რომ საზოგადოების აბსოლიტურმა უმრავლესობამ არ იცის რეალურად რა არის ევროპა, ან ამერიკა, მათ არ ქონიათ საშუალება რეალური ყოფა ენახათ სტატისტიკური ევროპელის. სტატისტიკური ქართველის უმრავლესობისთვის, უცნობია როგორია სტატისტიკური ევროპელის ცხოვრება, ანუ რა არის ის რისთვისაც საქართველო 25 წელია სისხლს ღვრის, ოფლს ღვრის და ამხელა რისკების და დარტყმების ქვეშ არის რუსეთის მხრიდან. უპირველესად სწორედ ამისთვის არის ევროკავშირთან უვიზო რეჟიმი საჭირო, რომ თითოეულ ქართველს ჰქონდეს შანსი ნახოს ის რეალობა რისთვისაც ის ამდენი წელია იბრძვის და თუ ეს სივრცე მისთვის კვლავ ჩაკეტილი იქნება და მხოლოდ ელიტებისთვის დარჩება ხელმისაწვდომი და ამავდროულად გაიხსნება რუსული სივრცე, იმ ფონზე როცა საქართველო ფაქტობრივად ჰიბრიდული ომის პირობებში იმყოფება რუსეთთან, რაც უპირველესად ნიშნავს იმას რომ რუსეთმა ფაქტობრივად საინფორმაციო სივრცე გადაფარა საქართველოსი და მიდის პირდაპირი პროპაგანდა და ამავდროულად კიდევ მეორე უმნიშვნელოვანესი თვალსაზრისი, რომ ეკონომიკური ბერკეტებით, პრეფერენციებით და ბენეფიტებით ცდილობს რუსეთი საქართველოს გადაფარვას და საზოგადოების განწყობის თავისკენ შებრუნებას, ამ ფონზე გახსნილი რუსეთი - ჩაკეტილი ევროპის საპირწონედ საკმაოდ დიდი რისკია“ - აღნიშნა ხათუნა ლაგაზიძემ.

ექსპერტის თქმით, დღევანდელი უმთავრესი გამოწვევა არის ეკონომიკა, ევროკავშირთან თავისუფალი ვაჭრობის მიღწევა კი საკმაოდ დიდი პერსპექტივაა ჩვენი ქვეყნისთვის.

„დღეს მთავარი გამოწვევა არის ეკონომიკა. ევროკავშრთან თავისუფალი ვაჭრობის რეჟიმმა ამ ქვეყანას მისცა ისეთი პერსპექტივა, რომელიც არ ჰქონია არასდროს, ეს არის გასაოცარი - რატომ არ ლაპარაკობს ხელისუფლება ამაზე? ხელისუფლება, რომელსაც საყვედურობენ ყოველ დღე, რომ ეკონომიკა გაუმართავია, ლარის კურსი ეცემა და ა.შ. მას ამხელა ბერკეტი აქვს ხელში და არსად არ აჟღერებს. იკვრება სამკუთხედი, რომლის ცენტრშიც არის საქართველო, მეორე წვერი - ევროკავშრის ბაზარი, სადაც საქართველოს შეუძლია საბაჟო გადასახადის გარეშე შეიტანოს პროდუქცია და მესამე - აღმოსავლეთის ქვეყნები. საქართველოში წესით უნდა დაიწყოს ინვესტიციების ბუმი, აღმოსავლეთის ქვეყნები, ჩინეთი, ირანი, თურქეთი, იაპონია, ყოფილი საბჭოთა შუა აზიის რესპუბლიკები და ასე შემდეგ, მათთვის ყველათვის საქართველო ხდება ინვესტიციებისთვის საოცრად მომხიბვლელი ბაზარი, იმიტომ რომ სამკუთხედის ამ წვერის გავლით, მოხდეს მათი მიერ ჩადებული ფულით საქართველოში წარმოებული პროდუქციის გატანა ევროკავშირში. ამას სჭირდება შესაბამისი საკანონმდებლო ცვლილებები სასწრაფოდ და ამ ქვეყნებთან უნდა გაფორმდეს თავისუფალი სავაჭრო რეჟიმი. ამას თავისთავად გააჩნია პლიუსები და მინუსები, თუმცა ყოველივე ეს უნდა შევისწავლოთ. საქართველო შესაძლოა იქცეს ისეთ ქვეყანად, რისთვისაც ამდენი თაობა იბრძვის, ხოლო ის, თუ რატომ არ აკეთებს მთავრობა ამას რთული სათქმელია - ან არ შეუძლიათ და მათი პროფესიონალიზმი ვერ წვდება ამდენს, ან აკეთებენ და ხალხამდე ვერ მოდის. ორივე შემთხვევაშ საქმე გვაქვს პროფესიონალიზმის და გამოცდილების ნაკლებობასთან“ - აცხადებს ხათუნა ლაგაზიძე.