კიდევ ერთი ნაბიჯი უნდა გადადგას პოლიტიკურმა საზოგადოებამ - პრეზიდენტი საარჩევნო სისტემის შეცვლაზე

პოლიტიკა - 15:18, 28 Apr, 2015

971

პრეზიდენტის ავლაბრის რეზიდენციაში გიორგი მარგველაშვილი ინტერპარტიული ჯგუფის, არასამთავრობო ორგანიზაციების წარმომადგენლებსა და ექსპერტებს ხვდება.

შეხვედრა მთავარი თემა საარჩევნო სისტემის გაუმჯობესება და მაჟორიტარული სისტემის გაუქმებაა.

როგორც შეხვედრის დაწყებისას, პრეზიდენტმა მისასალმებელ სიტყვაში აღნიშნა, საზოგადოებას უკვე სჯერა, რომ ხელისუფლება ამომრჩევლის ნების საფუძველზე იქმნება და ფორმირდება. მისი თქმით, ინტერპარტიული ჯგუფის წევრებთან შეხვედრა წინა შეხვედრების დროს დაიგეგმა, რაც, მისი თქმით, უაღრესად მნიშვნელოვანია.

„ჩვენი შეხვედრების რეჟიმში ვსაუბრობთ იმ ამოსავალ პირობებზე, რომელმაც უნდა შექმნას შესაძლებლობა უფრო დემოკრატიული, პლურალისტური საზოგადოების შექმნისა. საქართველოს პოლიტიკური მდგრადობა დამოკიდებულია იმაზე, თუ რამდენად პლურალისტურ პოლიტიკურ ველს შევქმნით და ის წინ გადადგმული ნაბიჯია. საზოგადოებას უკვე სჯერა, რომ ხელისუფლება ამომრჩევლის ნების საფუძველზე იქმნება, იცვლება და ფორმირდება“, -განაცხადა საქართველოს პრეზიდენტმა.

მარგველაშვილის თქმით, ქართულმა პოლიტიკურმა საზოგადოებამ ახლა კიდევ ერთი ნაბიჯი უნდა გადადგას და პლურალისტურ პოლიტიკური გარემოს უზრუნველსაყოფად ისეთი სისტემა უნდა შექმნას, რომელიც საქართველოში ნამდვილ ევროპულ სათამაშო ველს შექმნის. როდესაც პარლამენტი დაკომპლექტებული იქნება ძლიერი, სტაბილური ძალების და არა - ერთი და ორი პოლიტიკური ძალის მიერ.

პრეზიდენტის თქმით, მისთვის ასევე, სახელმიწფოებრივად მნიშვნელობის და რანგის თემაა ის ინტერესი, რაც პოლიტიკურ პარტიებს ამ მიმართულებით გააჩნიათ.

„მივესალმები ჩვენს შეხვედრას და იმედი მაქვს, რომ დღევანდელი შეხვედრის შემდეგ უკვე ყველა ნაბიჯს გადავდგამთ იქითკენ, რომ რეალურად უზრუნველვყოთ ის საკანონმდებლო ცვლილებები, იმ სისტემების შეცვლა, რომელიც საქართველოში პლურალისტურ პოლიტიკურ გარემოს უზრუნველყოფს“, - განაცხადა გიორგი მარგველაშვილმა.