„ახალი მემარჯვენეების“ ერთ-ერთი ლიდერის მამუკა კაციტაძის თქმით, მათი პარტია ევროატლანტიკურ სტრუქტურებში საქართველოს ინტეგრაციის აუცილებლობაზე, პოლიტიკური ცხოვრების პირველივე დღიდანვე საუბრობდა. როგორც მამუკა კაციტაძე „ნიუპოსტთან“ საუბარში აცხადებს, დღეს როდესაც პრორუსულმა ძალებმა გარკვეულწილად იმძლავრა, პროდასავლურმა ძალებმა კონსოლიდაცია უნდა მოახდინონ:

„ახალი მემარჯვენეები ჩვენი პოლიტიკური ცხოვრების პირველივე დღიდან აბსოლუტურად მკაფიოდ და არა ორ აზროვნად ვაფიქსირებდით ჩვენს დამოკიდებულებას ევროპულ და ევროატლანტიკურ სტრუქტურებში საქართველოს ინტეგრაციის აუცილებლობაზე და დღეს როდესაც გარკვეულწილად იმძლავრა პრორუსულმა ძალებმა და გარკვეული ღია ტექსტები ისმის ევრაზიულ კავშირთან მიმართებაში, ზურგშექცევასთან მიმართებაში ნატოსთან და ევროკავშირთან, მიმაჩნია, რომ პოლიტიკური და სამოქალაქო სექტორის წევრებმა, ვინც მომხრეა საქართველოს ნატოში ინტეგრაციისა, უნდა განახორციელოს კონსოლიდაცია. ქართულ საზოგადოებაში უწყვეტად უნდა განვითარდეს აზრი, რომ თუ საქართველოს აქვს ხვალინდელი დღე და მომავალი - ის პირდაპირ უკავშირდება ევროპას, ევროატლანტიკურ სტრუქტურებს, ევროკავშირს, ნატოს და ამ ქვეყანაში სხვა ალტერნატივა არ უნდა არსეობდეს.“- განაცხადა მამუკა კაციტაძემ.