„ახალი მემარჯვენეების“ ლიდერი ფიქრია ჩიხრაძე, გარემოს დაცვის მინისტრის გადადგომას ეხმაურება და აღნიშნავს, რომ მინისტრთა კაბინეტში ერთი გუნდის მეორე გუნდით ჩანაცვლება მიმდინარეობს. როგორც ჩიხრაძემ „ნიუპოსტთან“ საუბარში განაცხადა მომავალი შემადგენლობა ბიძინა ივანიშვილის პირადი სიმპათიით და ერთგულებით შერჩეული ადამიანებისგან დაკომპლექტდება:

„არსებობდა მოლოდინი და საუბრები იმის შესახებ, რომ ხოკრიშვილიც იმ ადამიანთა სიაშ აღმოჩნდებოდა, ვინც თითქოს თავიანთი სურვილით დატოვეს თანამდებობა. ფაქტია რომ ეს გუნდის შიგნით ჩანაცვლების ეგიდით ხდება. აშკარად ერთი შემადგენლობა ტოვებს ასპარეზს და მეორე შემოდის, როგორც ჩანს ეს შემადგენლობა იქნება ბიძინა ივანიშვილის არათუ პირადი სიმპათიით შერჩეული ადამიანებით დაკომპლექტებული, არამედ პირადი ერთგულების ნიშნით შერჩეული მთავრობა გვეყოლება. არ გამოვრიცხავ იმასაც, რომ მეშვიდე მინისტრიც გამოჩნდეს და მოხდეს მთავრობის სრული შემადგენლობის გადახალისება. ამ წუთში პირდაპირ ვერ დავასახელებ ვინ შეიძლება იყოს მეშვიდე, თუმცა ეს უახლოეს მომავალში მოხდება, თუ ზაფხულში არა, შემოდგომაზე აუცილებლად.

აშკარაა ისიც, რომ ირაკლი ღარიბაშვილი დატოვებს დაკავებულ თანამდებობას, ეს აშკარად იგრძნობა, არ ვიცი კონკრეტულად ვინ იქნება მისი შემცვლელი - იქნება ეს 20/30-დან, თუ ბიძინა ივანიშვილის პირადი გარემოცვიდან, თუმცა ფაქტია რომ ირაკლი ღარიბაშვილმა ბიძინა ივანიშვილის ნდობის ლიმიტი ამოწურა. ძალიან ცუდია როდესაც ერთი ადამიანის ნება სურვილითა და განწყობებით იმართება ქვეყანა. ივანიშვილი დიდი სიამოვნებით ჩაანაცვლებდა მარგველაშვილსაც, უბრალოდ პრეზიდენტი სხვა პროცედურით არის არჩეული, რაც მას თავისთავად იცავს.

საზოგადოებაში ხელისუფლების მიმართ ნდობა რეალურად აღარ არსებობს და თუ ხელისუფლებას აქვს იმის შეგრძნება რომ საზოგადოება მას ენდობა, ეს არის თავის მოტყუება. საკმაოდ უცნაური ვითარებაა, ხელისუფლებაში შესაძლოა საზოგადოება ენდობა კონკრეტულ წარმომადგენლებს, მაგალითად სერგეენკო, კვირიკაშვილი, თუმცა მთავრობას ერთიანად არ ენდობა. საქმე ისაა რომ, ის ვინც საზოგადოებამ აირჩია, ანუ ბიძინა ივანიშვილი - სადღაც სრულიად გაურკვევლად წავიდა, მას არ გააჩნია ოფიციალური პასუხისმგებლობა, იქ სადაც არის. თუმცა ის ყველაფერში ერევა, ამ შემთხვევაშ საზოგადოებამ ისიც არ იცის, ვის უნდა დააკისროს პასუხისმგებლობა. დასახელდა ღარიბაშვილი, თუმცა კვირაობით ბიძინა ივანიშვილი მართავს ქვეყანას და ყველა პროცესი ამის ირგვლივ ეწყობა.“- აცხადებს ფიქრია ჩიხრაძე.