თავდაცვის ყოფილი მინისტრის ირაკლი ალასანიას განცხადებას იმასთან დაკავშირებით, რომ თანხა, რომელიც თავდაცვის სამინისტრომ კომპანია "სილქნეტს" გადაუხადა, თავიდანვე გათვალისწინებული და პრემიერთან შეთანხმებული იყო. მთავრობის ადმინისტრაციის უფროსი მაია ცქიტიშვილი გამოეხმაურა. ცქიტიშვილის თქმით, 2013 წლის 26 დეკემბერს მინისტრთა კაბინეტმა განიხილა მთავრობის სარეზერვო ფონდიდან თავდაცვის სამინისტროსთვის 5 მილიონი ლარის გამოყოფის საკითხი და პრემიერმა ამის შესახებ იცოდა, თუმცა ის არ ფლობდა ინფორმაციას დეტალების თაობაზე.

"მთავრობამ 2013 წლის 26 დეკემბრის სხდომაზე თავაცვის სამინისტროსთვის ოპტიკური ხაზისა და მის შემოსაერთებლად საჭირო აპარატურის შესყიდვასთან დაკავშირებული ხარჯების დაფინანსებისთვის თანხა გამოყო. მოგეხსენებათ, რომ მთავრობის სხდომის ფორმატში ჩვენ ვერ განვიხილავდით ყელა იმ დეტალს, რომელიც ამ საკითხს ეხებოდა. ეს იყო უბრალოდ დასაბუთებული ბატონი ირაკლის მიერ, რომ ეს თანხა იყო საჭირო თავდაცვის სამინისტროსთვის. დანარჩენი სხვა დეტალები მთავრობის ფორმატში განხილული ვერ იქნებოდა. სხვა საკითხები - ვისთან უნდა გაფორმებულიყო ხელშეკრულება, როგორ უნდა გაფორმებულიყო, რა ტექნიკურ პარამეტრებს მოიცავდა, რა თქმა უნდა, განხილული არ იყო და ვერც იქნებოდა, რადგან ასეთ დეტალებზე პასუხისმგებელია უშუალოდ ინიციატორი უწყება. ჩვენ ამას გვეუბნება მთავრობის რეგლამენტიც", - განაცხადა ცქიტიშვილმა.

შეგახსენებთ, დღეს თბილისის საქალაქო სასამართლოში ე.წ კაბელების საქმესთან დაკავშირებით სასამართლო პროცესი გაიმართა, რომელსაც „ტავისუფალი დემოკრატების“ ლიდერი ირაკლი ალასანიაც ესწრებოდა. ირაკლი ალასანიამ მედიასთან კომენტარი იმ თანხასთან დაკავშირებით გააკეთა, რომელიც თავდაცვის უწყებამ კომპანია სილქნეტს გადაუხადა და რომლის გაფლანგვის ბრალდებითაც თავდაცვის სამინისტროს ხუთი მაღალჩინოსანი 2014 წლის 28 ოქტომბერს დააკავეს:

"ძალიან ბევრი ტყუილ-მართალია ამ საქმის ირგვლივ აგორებული და მათ შორის იგივე, რომ პრემიერმინისტრმა თითქოს არ იცოდა, თუ რისთვის იყო ეს თანხა გამოყოფილი. კიდევ ერთხელ ვიტყვი, რომ ძალიან მალე, სწორედ ეს და სხვა სიცრუეც გამოვლინდება და ნათელი გახდება. ხაზგასმით მინდა აღვნიშნო, რომ ეს თანხა მთავრობასთან და პრემიერთან შეთანხმებით, კონკრეტულად ამ პროექტის განსახორციელებლად იყო გამოყოფილი. ასე რომ, ეს არის ის ობიექტური გარემოებები, რაც მინდა, რომ საზოგადოებამ იცოდეს", - განაცხადა ალასანიამ.