,,ჩემი და ივანიშვილის ღირებულებათა სისტემა ერთმანეთს ემთხვევა“

,,ჩემი და ივანიშვილის ღირებულებათა სისტემა ერთმანეთს ემთხვევა“ - თინა ხიდაშელი

პოლიტიკა - 16:02, 25 Apr, 2015

12503

პარლამენტის ევროინტეგრაციის კომიტეტის თავმჯდომარე თინა ხიდაშელი ყოფილ პრემიერ ბიძინა ივანიშვილთან ურთიერთობით ამაყობს და სურვილი აქვს, რომ ეს ურთიერთობა ბევრი წელი გაგრძელდეს. ამის შესახებ ხიდაშელი ,,for.ge“-სთან ინტერვიუში საუბრობს. კანონმდებელის თქმით, მისი და ივანიშვილის ღირებულებათა სისტემა ერთმანეთს ემთხვევა და მან წინასწარ იცის, ამა თუ იმ საკითხზე ივანიშვილი რას ფიქრობს. თინა ხიდაშელი ,,თავისუფალი დემოკრატების“ მიერ ივანიშვილის შეფასებას ეხმაურება, ის არ ფიქრობს, რომ ივანიშვილი არაფორმალური მმართველია.

,,ეს არაფორმალური მმართველობა არ არის. არაფორმალური მმართველობა მხოლოდ ისაა, როდესაც მთავრობის ნაცვლად გადაწყვეტილებებს ხელისუფლების გარეთ მყოფი პირი იღებს, თავად ხელისუფლება კი, ამ პირის ნების აღმსრულებელია. ბიძინა ივანიშვილს კონკრეტული თემის თაობაზე კითხვით, რეკომენდაციით თუ მისი პოზიციის დაფიქსირების მიზნით, რამდენჯერაც არ უნდა დავურეკო, ეს არაფორმალური მმართველობა არ იქნება“ - აცხადებს ხიდაშელი.

რამდენად ხშირად ურეკავს ის ყოფილ პრემიერს და არის თუ არა მისი აზრი ღირებული, ხიდაშელი ამბობს, რომ ივანიშვილის და მისი ღირებულებათა სისტემა ერთმანეთს ემთხვევა.

,,მას მე ნაკლებად ვურეკავ, მაგრამ მისთვის დამირეკავს კიდეც. როდესაც იცი, რომ ქვეყანაში ადამიანი არსებობს, რომლის აზრიც, ალბათ, ბევრისთვის ყველაზე მეტად ანგარიშსგასაწევი და საინტერესოა, მას აზრი უნდა ჰკითხო. როდესაც ქუჩაში მიტინგი იყო და ტაბურეტკებით დარბოდნენ, ბიძინა ივანიშვილს აუცილებლად დავურეკავდი და დიახ, დავურეკე კიდეც. პრინციპში, მისი აზრი ვიცოდი და გასარკვევი არაფერი მქონდა. მის პოზიციაში დარწმუნებული ვიყავი. ჩვენი ღირებულებათა სისტემა ერთმანეთს იმდენად ემთხვევა, რომ რაიმეს გარკვევა დიდად არ მჭირდება. წინასწარ ვიცი, მას ასეთი ტიპის მნიშვნელოვან საკითხზე რა დამოკიდებულება ექნება. მას დავურეკე, რადგან მინდოდა, რომ მისი აზრი ჩემს გარდა, სხვებსაც სცოდნოდათ. რა თქმა უნდა, მასთან ურთიერთობა მაქვს, რითაც ვამაყობ და დიდი სურვილი მაქვს, რომ ეს ურთიერთობა ბევრი წელი გაგრძელდეს“ - აცხადებს ,,რესპუბლიკელი“ თინა ხიდაშელი.