"ლოცვა უნდა გავაძლიეროთ... პატრონი, ჭკუათმყოფელი არ ჩანს"- ნათია ფანჯიკიძე

სოც.მედია - 11:47, 25 Apr, 2015

4231

გადაცემა "რეაქციაში" გუშინ გაჟღერებულ ინფორმაციას თავდაცვის ყოფილი მინისტრის ირაკლი ალასანიას მეუღლე, სოციალურ ქსელში ეხმაურება.
"წყალი არ გაუვა, საქართველოს ნამდვილად ღვთისმშობელი ან მასზე გავლენიანი ზეძალა, თავად ღმერთი იფარავს.
ფული რისთვის უნდოდა არ მიკითხავსო, - ასე გამოდის ხო? რა საყვარლობაა, ამაზე ვერც გაბრაზდები, ლოცვა კი უნდა გავაძლიეროთ, სანამ ასეთ დღეში ვართ, რამე სერიოზული არ შეემთხვეს ქვეყანას, თორემ პატრონი, ჭკუათმყოფელი არ ჩანს."- წერს ნათია ფანჯიკიძე.
შეგახსენებთ, ადვოკატ სოსო ბარათაშვილის მიერ გავრცელებული ინფორმაციით თავდაცვის სამინისტროსთვის ახალი კომუნიკაციების მშენებლობისთვის თანხის გამოყოფის აუცილებლობა პრემიერ-მინისტრმა ირაკლი ღარიბაშვილმა განკარგულებაზე ხელის მოწერით დაადასტურა.
„რომ არ მოხდეს საზოგადოების შეცდომაში შეყვანა, საჭიროდ ვთვლით განმარტება გავაკეთოთ. პრემიერ-მინისტრმა, როგორც მთავრობის მეთაურმა, რა თქმა უნდა, ხელი მოაწერა თანხის გამოყოფის შესახებ განკარგულებას, თუმცა იქ საუბარი იყო მხოლოდ თანხის გამოყოფაზე ფინანსთა სამინისტროს მიერ. ხოლო რაში უნდა დახარჯულიყო ეს თანხა, ეს სრულად მაშინდელი მინისტრის, ირაკლი ალასანიას პასუხისმგებლობაა“,- ნათქვამია პრემიერ-მინისტრის განცხადებაში.

თავდაცვის სამინისტროს მოქმედი თანამდებობის 5 პირი, 4 მილიონ ლარზე მეტი საბიუჯეტო თანხების გაფლანგვის ბრალდებით, 2014 წლის 28 ოქტომბერს დააკავეს. გამოძიების ინფორმაციით, თავდაცვის სამინისტრომ საიდუმლო შესყიდვა გამოაცხადა, რომელიც ოპტიკურ-ბოჭკოვანი მაგისტრალის გაყვანას შეეხებოდა. სამინისტროს მაღალი თანამდებობის პირებმა კი კომპანია „სილქნეტი“ პრივილეგირებულ მდგომარეობაში ჩააყენეს და მომსახურებაში, რომელიც, პროკურატურის შეფასებით, 2 მილიონი ლარის ღირებულებისაა, „სილქნეტმა“ 6 მილიონი ლარი მიიღო.

ო'ენ ენი