ხელი პრემიერმა მოაწერა, თანხის დახარჯვა კი ალასანიას პასუხისმგებლობა იყო

ხელი პრემიერმა მოაწერა, თანხის დახარჯვა კი ალასანიას პასუხისმგებლობა იყო - პრემიერის პრესსამსახური

პოლიტიკა - 11:43, 25 Apr, 2015

1826

„იმედის“ ეთერში გადაცემა „რეაქციის“ წამყვანმა ინგა გრიგოლიამ ე.წ კაბელების საქმეზე, ახალი კომუნიკაციების მშენებლობისთვის თანხის გამოყოფის საკითხზე, ადვოკატ სოსო ბარათაშვილის მიერ გავრცელებული ინფორმაცია მოწვეულ სტუმრებს გააცნო, რასაც მოგვიანებით პრემიერ-მინისტრ ირაკლი ღარიბაშვილის პრესსამსახური გამოეხმაურა.
ადვოკატის ინფორმაციით, მთავრობის სხდომაზე ფინანსთა სამინისტრომ, 26 დეკემბერს მომზადებული ხელშეკრულება გაიტანა, რომელიც თავდაცვის სამინისტროსთვის ახალი კომუნიკაციების მშენებლობისთვის თანხის გამოყოფას გულისხმობდა. თანხის გამოყოფის აუცილებლობა პრემიერ-მინისტრმა ირაკლი ღარიბაშვილმა განკარგულებაზე ხელის მოწერით დაადასტურა.
ამასთან, როგორც პრემიერ-მინისტრის პრესსამსახურში განმარტავენ, პრემიერმა, როგორც მთავრობის მეთაურმა, ხელი მოაწერა თანხის გამოყოფის შესახებ განკარგულებას, თუმცა რაში უნდა დახარჯულიყო ეს თანხა, ეს მაშინდელი თავდაცვის მინისტრის, ირაკლი ალასანიას პასუხისმგებლობაა.

„რომ არ მოხდეს საზოგადოების შეცდომაში შეყვანა, საჭიროდ ვთვლით განმარტება გავაკეთოთ. პრემიერ-მინისტრმა, როგორც მთავრობის მეთაურმა, რა თქმა უნდა, ხელი მოაწერა თანხის გამოყოფის შესახებ განკარგულებას, თუმცა იქ საუბარი იყო მხოლოდ თანხის გამოყოფაზე ფინანსთა სამინისტროს მიერ. ხოლო რაში უნდა დახარჯულიყო ეს თანხა, ეს სრულად მაშინდელი მინისტრის, ირაკლი ალასანიას პასუხისმგებლობაა“,- ნათქვამია პრემიერ-მინისტრის განცხადებაში.

თავდაცვის სამინისტროს მოქმედი თანამდებობის 5 პირი, 4 მილიონ ლარზე მეტი საბიუჯეტო თანხების გაფლანგვის ბრალდებით, 2014 წლის 28 ოქტომბერს დააკავეს. გამოძიების ინფორმაციით, თავდაცვის სამინისტრომ საიდუმლო შესყიდვა გამოაცხადა, რომელიც ოპტიკურ-ბოჭკოვანი მაგისტრალის გაყვანას შეეხებოდა. სამინისტროს მაღალი თანამდებობის პირებმა კი კომპანია „სილქნეტი“ პრივილეგირებულ მდგომარეობაში ჩააყენეს და მომსახურებაში, რომელიც, პროკურატურის შეფასებით, 2 მილიონი ლარის ღირებულებისაა, „სილქნეტმა“ 6 მილიონი ლარი მიიღო.