პრემიერი მთავრობის სხდომაზე სასამართლო სისტემაში კორუფციის სავარაუდო არსებობაზე შვეიცარიის ელჩის განცხადებას გამოეხმაურა და საგარეო საქმეთა და შინაგან საქმეთა მინისტრებს დავალება მისცა, გამოთქმული პრეტენზიები შეისწავლონ.

მან თამარ ბერუჩაშვილს სთხოვა, დღესვე შეხვდეს გიუნტერ ბეხლერს და გაარკვიოს, რით არის შეწუხებული ელჩი. მან ასევე განაცხადა, რომ ბეხლერთან შეხვედრისთვის თავადაც მზად არის.

„ჩვენთვის ძალიან მნიშვნელოვანია, თუ რას ფიქრობს ჩვენი მეგობარი ქვეყნის ელჩი. ბოლო 2 წლის განმავლობაში მოვიპოვეთ აღიარება, რომ ერთ-ერთი ყველაზე გამჭვირვალე და ნაკლებად კორუმპირებული მთავრობა ვართ. ასე რომ, ჩემთვის თითოეული კითხვის ნიშანი მნიშვნელოვანია. გთხოვთ ყველაფერი გაარკვიოთ და კონკრეტული ფაქტების დონეზე შეისწავლოთ თითოელი საკითხი. ბატონო ვახტანგ, თუ საჭიროა თქვენც ჩაერთეთ და გაარკვიეთ ყველაფერი“, - მიმართა პრემიერმა ბერუჩაშვილს და გომელაურს.

შვეიცარიის ელჩმა გიუნტერ ბეხლერმა დღეს პარლამენტის წევრებთან შეხვედრამდე კორუფციული ფაქტების შესახებ კიდევ ერთი განცხადება გააკეთა. გიუნტერ ბეხლერის თქმით, საქართველოში კორუფციასთან დაკავშირებული პოტენციური პრობლემები სერიოზულია. ელჩის თქმით, მას გააჩნია ინფორმაცია, რომ უცხოელი ინვესტორები შეშფოთებული არიან გარკვეული კორუფციული ფაქტების არსებობის გამო და ეს საკითხი შესაბამისმა უწყებამ უნდა განიხილოს.