,,არ მგონია რუსეთს ლუკაშენკო დანაბარებით გამოეშვა...“

,,არ მგონია რუსეთს ლუკაშენკო დანაბარებით გამოეშვა...“ - თორნიკე შარაშენიძე

პოლიტიკა - 19:21, 23 Apr, 2015

2111

ბელორუსიის პრეზიდენტის საქართველოში ვიზიტს აფასებს თორნიკე შარაშენიძე. რაც შეეხება ვიზიტის მიზეზს, ექსპერტი ,,ნიუპოსტთან“ საუბარში ვარაუდობს, რომ მთავარი მიზეზი შესაძლოა უკრაინაში მიმდინარე მოვლენები იყოს.

,,აქამდე ბევრი რამე მომხდარა ქართულ-ბელორუსულ ურთიერთობაში, იყო დაძაბული მომენტებიც სააკაშვილის დროს და სააკაშვილის დროსვე გამოსწორდა მნიშვნელოვნად, მას შემდეგ რაც ბელორუსიამ არ სცნო აფხაზეთი და სამხრეთ ოსეთი დამოუკიდებლად, რუსეთის მხრიდან ზეწოლის მიუხედავად“ - აცხადებს შარაშენიძე.

რას გულისხმობდა ლუკაშენკოს განცხადება „ვიცხოვროთ ერთ ოჯახში, როგორც ადრე“ - ექსპერტი ამბობს, რომ ლუკაშენკოს რაიმე ღია განცხადება უნდა გაეკეთებინა ისეთი, რითიც ასიამოვნებდა მოსკოვს, ,,ამიტომ გააკეთა ეს განცხადებაც „ვიცხოვროთ ერთ ოჯახში, როგორც ადრე“. მე მგონია, რომ დახურულ შეხვედრაზე სხვა რაღაცაზე იქნებოდა საუბარი. რაც შეეხება ვაჭრობის შეთანხმებას ამაში ცუდი არაფერი არ არის, ჩვენ ვვაჭრობთ ევროკავშირის და ევრაზიული კავშირის წევრ ქვეყნებთანაც, ოღონდ ჩვენ ევრაზიული კავშირის წევრები არ ვართ. თავისუფალი ვაჭრობა ყველასთან თუ გვექნება ძალიან კარგია. არ მგონია ლუკაშენკო შუამავალი ყოფილიყო და რუსეთს ის დანაბარებით გამოეშვა...“ - აცხადებს ექსპერტი.

რაც შეეხება ლუკაშენკოს განცხადებას რომ საქართველოში არსად ყოფილა სოხუმის გარდა, თორნიკე შარაშენიძე ამბობს, რომ ბელორუსიის პრეზიდენტი არ მალავდა და ყოველთვის ღიად გამოხატავდა თავის პოზიციას 2008 წლის ომთან დაკავშირებით, ,,ლუკაშენკო არასოდეს მალავს, რომ ის არ იწონებს არც 2008 წლის ომს და არც უკრაინაში მიმდინარე მოვლენებს“ - აცხადებს შარაშენიძე.