,,სპეცრაზმელები და პოლიციელები დღეს საფრთხის წინაშე დგანან“

,,სპეცრაზმელები და პოლიციელები დღეს საფრთხის წინაშე დგანან“ - „სამართალდამცავთა დაცვის ლიგა“

პოლიტიკა - 14:57, 23 Apr, 2015

2053

არასამთავრობო ორგანიზაცია „სამართალდამცავთა დაცვის ლიგა“ მიმართავს ხელისუფლებას და კატეგორიულად მოუწოდებს დაიცვას იმ სპეცრაზმელთა და პოლიციელთა ოჯახის წევრების უსაფრთხოება, რომლებსაც თითქმის ყოველდღე პოლიტიკური მიზნებისთვის საგამოძიებო ორგანოში ატარებენ, ხოლო სპეცრაზმის წევრებს ნიღბებს ხსნიან და სახელებსა და გვარებს ასაჯაროვებენ - ამის შესახებ ,,სამართლადამცავთა დაცვის ლიგის“ მიერ გავრცელებულ განცხადებაშია აღნიშნული.

ორგანიზაცია მიიჩნევს, რომ სპეცდანიშნულების რაზმის წევრები პოლიტკური გადაწყვეტილების მსხვერპლნი აღმოჩნდნენ. ,,სამართლადამცავთა დაცვის ლიგის“ წევრები აცხადებენ, რომ პოლიციელთა მიმართ ასეთი დამოკიდებულება უარყოფითად აისახება ქვეყნის განვითარებაზე.

,,სახელმწიფო, სპეცდანიშნულების რაზმის წევრებს, საქართველოს ტერიტორიული მთლიანობისა და ორგანიზებული დანაშაულის წინააღმდეგ ბრძოლაში მსხვერპლი აქვთ გაღებული და ხშირ შემთხვევაში სისხლი აქვთ დაღვრილი. სამწუხაროდ, დღევანდელი სახელმწიფო ორგანიზებულ დანაშაულთან ლოიალურია. სამაგიეროდ, სპეცრაზმელებით, საქართველოს ეროვნული გმირებით, ვახტანგ გორგასლის, მხედრული მამაცობისთვის და ღირსების ორდენის კავალერებით ციხეებს ავსებს. სპეცრაზმელები, რომლებიც ყველა ოპერაციაში მონაწილეობდნენ კანონის ფარგლებში - „კანონი პოლიციის შესახებ“, დღეს პოლიტიკური ნებიდან გამომდინარე, პოლიტიკური გადაწყვეტილებების მსხვერპლნი აღმოჩნდნენ. კრიმინალების დაკავების ოპერაციაში მონაწილე სპეცრაზმელები და პოლიციელები დღეს საფრთხის წინაშე დგანან და არა მხოლოდ ისინი, არამედ მათი ოჯახის წევრები.

შს მინისტრმა, ყოფილმა სპეცრაზმელმა, თავისი „მოღვაწეობა“ სპეცრაზმელთა მასიური დევნით და დაპატიმრებებით დაიწყო და დღესაც „წარმატებით“ აგრძელებს. ეს ყოვლად მიუღებელი დამოკიდებულება პოლიციელთა მიმართ, უკვე იწვევს უმძიმეს შედეგს, სამომავლოდ კი უარყოფითად იმოქმედებს სახელმწიფოს განვითარებაზე“ - ნათქვამია ,,სამართლადამცავთა დაცვის ლიგის“ მიერ გავრცელებულ განცხადებაში.