23 აპრილს, საქართველოს ჟურნალისტური ეთიკის ქარტიის საბჭოს სხდომა გაიმართება . სადაც განიხილება საქმე “ხათუნა ჩარკვიანი ინგა გრიგოლიას წინააღმდეგ”.

ჟურნალისტური ეთიკის ქარტიამ განსახილველად ჟურნალისტ ინგა გრიგოლიას წინააღმდეგ განცხადება დაახლოებით ერთი თვის წინ მიიიღო.

განცხადება ფრაქცია “ქართული ოცნების” პრესმდივანს, ხათუნა ჩარკვიანს ეკუთვნის. ჩარკვიანის აზრით, წამყვანმა, ტელეკომპანია “იმედის” ეთერში გაკეთებული განცხადებებით ქარტიის პირველი პრინციპი დაარღვია.

„მიმდინარე წლის 20 მარტს გადაცემაში რეაქციის წამყვანმა, ინგა გრიგოლიამ საინფორმაციო გადაცემა „ქრონიკის“ ეთერში საკუთარი გადაცემის ანონსირებისას განაცხადა შემდეგი „საპარლამენტო უმრავლესობამ ჩვენგან კატეგორიულად მოითხოვა, რომ ეს თემა არ გაშუქებულიყო თოქშოუს ფორმატში. წინააღმდეგ შემთხვევაში, მათ განგვიცხადეს, რომ გადაცემაში არ მოვიდოდნენ. ჩვენ, რასაკვირველია, ხელისუფლების მოთხოვნას არ ვემორჩილებით, რა თემა უნდა გავაშუქოთ და რა -არა.

ჩვენი აზრით, ეს არის ქარტიის პირველი მუხლის დარღვევა: ჟურნალისტმა პატივი უნდა სცეს სიმართლეს და საზოგადოების უფლებას – მიიღოს ზუსტი ინფორმაცია“ - ნათქვამია ჩარკვიანის განცხადებაში.