ჟორჟოლიანი მებრძოლებს სახელმწიფოს მიერ განსაზღვრული პოლიტიკის დაცვისკენ მოუწოდებს

პოლიტიკა - 14:54, 22 Apr, 2015

1014

საპარლამენტო უმრავლესობის წევრმა გია ჟირჟილიანმა განაცხადა, რომ საქართველოს აქვს მკაფიოდ გამოხატული პოზიცია და არ მონაწილეობს უკრაინაში მიმდინარე საბრძოლო მოქმედებებში. ჟორჟოლიანი ქართველ მებრძოლებს სახელმწიფოს მიერ განსაზღვრული პოლიტიკის დაცვის და მის ფარგლებში მოქმედებისკენ მოუწოდებს.

„პირველ რიგში ვუსამძიმრებ მათ ოჯახებს ვინც უკრაინაში დაუღუპა. რაც შეეხება იმას, რომ ეს არის ბრძოლა საერთო მტრის წინააღმდეგ - ეს არ არის სწორი. ომი შეუძლია აწარმოოს მხოლოდ სახელმწიფოს. ცალკეულ ადამიანებს ომის წარმოება არ შეუძლიათ. ეს თუ ასე არ არის, სახელმწიფო თავის ძირითად ფუნქციას კარგავს. სახელმწიფოს კლასიკური განმარტება გვეუბნება, რომ სახელმწიფო, ეს არის ორგანიზაცია, რომელსაც გარკვეულ ტერიტორიაზე ექსსკლუზიურად გააჩნია ძალის ლეგიტიმურად გამოყენების უფლება. ჩვენ რომ ეს უფლება ყველა ადამიანს მივანიჭოთ და მათ თვითონ გადაწყვიტონ როდის ვის გამოუცხადონ ომი, ჩვენ მივიღებთ ქაოსს. საქართველოს ტერიტორიები რა თქმა უნდა ოკუპირებულია რუსეთის მიერ, მაგრამ ჩვენმა ხალხმა გადაწყვიტა, რომ იარაღით ხელში არ გადაწვიტოს ეს პრობლემა. ჩვენ ვიყენებთ სამართლებრივ გზებს და ვცდილობთ სწორედ ამ გებით გადავწყვიტოთ ის პრობლემები რომლებიც ამ მიმართულებით გვაქვს. ამდენად, ჩემთვის სრულიად გაუგებარია როგორ შეიძლება ეს ყველაფერი საქართველოს სახელმწიფოს ან ქართველი ხალხის ბრძოლად წარმოვიდგინოთ. საქართველოს სახელმწიფოს აქვს მკაფიოდ გამოხატული პოზიცია, რომ ის არ მონაწილეობს უკრაინაში მიმდინარე საბრძოლო მოქმედებებში. მე მოვუწოდებდი ქართველ მებრძოლებს დაიცვან სახელმწიფოს მიერ განსაზღვრული პოლიტიკის ჩარჩოები და ამ ჩარჩოებში იმოქმედონ,“-განაცხადა გია ჟორჟოლიანმა.

ეს განცხადება გია ჟორჟოლიანმა გუშინ, უკრაინაში მიმდინარე მოვლენებზე საუბრისას, საზოგადოებრივი მაუწყებლის მეორე არხზე „არგუმენტების დროში“ გააკეთა.