ვის მოხსნიან შავლიაშვილის მერე?- "ხოკრიშვილსაც მალე მოუწევს განცხადების დაწერა"

პოლიტიკა - 14:29, 22 Apr, 2015

1922

ვის მოხსნიან შავლიაშვილის მერე და გამოუცხადებს თუ არა ახლა მთავრობას პარლამენტი ნდობას. ამ თემებთან დაკავშირებით იურისტი ვალერი გელბახიანი გაზეთ „ალიას“ ესაუბრა. როგორც გელბახიანი აცხადებს შავლიაშვილის გადადგომა ავადმყოფობასთან კავშირში არაა:

„ეს არის იმ სკანდალური თემის გაგრძელება, რაც უკავშირდება ჯანყარაშვილს. რა თქმა უნდა, ლოგიკას მოკლებულია შავლიაშვილის მისამართით გავრცელებული განცხადება, რომ მას თანდაყოლილი ავადმყოფობა აღმოაჩნდა, მაშინ რატომ იყო დანიშნული?

ეს არის პოლიტიკური და წმინდა სამართლებრივი ხასიათის საკითხი. უფრო მეტიც, ამ წრიდან დარჩენილი მინისტრებიც კითხვის ნიშნის ქვეშ არიან და მათაც მოუწევთ თანამდებობიდან გადადგომა!“- აცხადებს გელბახიანი და აღნიშნავს, რომ ამ წრიდან დარჩენილ მინისტრებს შორის არის ელგუჯა ხოკრიშვილი:

„გარემოს დაცვის მინისტრი ელგუჯა ხოკრიშვილია ჯანყარაშვილის წრიდან, ამიტომ ვფიქრობ, რომ მასაც მალე მოუწევს განცხადების დაწერა“.

ვალერი გელბახიანის შეფასებით, ხოკრიშვილის და ლევან ყიფიანის გადადგომა რომლის პოსტის დატოვებასაც საპარლამენტო უმრავლესობა ითხოვს, შემოდგომაზე მოხდება.

„ღარიბაშვილს ეძლევა შანსი, რომ თვითონ შექმნას მთავრობა, მაგრამ ეჭვი მეპარება, რომ ღარიბაშვილმა ახალი მთავრობა შექმნას, ის ერთ ან ორ ცვლილებას განახორციელებს. ივანიშვილის გარეშე მთავარი ცვლილება არ მოხდება, ეს ცხადზე ცხადია! არჩევნებამდე დარჩენილია ერთი წელი, ვფიქრობ, ასეთი დიდი ცვლილება შემოდგომისთვის იქნება დაგეგმილი და არა ახლა. მე როცა ვამბობ, რომ შავლიაშვილს მიჰყვება გარემოს დაცვის მინისტრი, აუცილებლად მოხდება ახლა თუ არა შემოდგომაზე, გამოსაცვლელია ბევრი მინისტრი, მათ შორის სპორტის მინისტრი. ის მასშტაბურ საკადრო ცვლილებებს შეეწირება“- აცხადებს გელბახიანი.