მიმდინარე წლის ბოლომდე თბილისში 24 სახეობის ნაგავშემკრები მანქანა და სპეციალური ტექნიკა შემოვა.

ნაგავშემკრები მანქანებისა და სპეციალური ტექნიკის შესყიდვის მიზნით ინტერესთა გამოხატვის დოკუმენტი დედაქალაქის მთავრობამ დღევანდელ სხდომაზე დაამტკიცა.

სხდომაზე თბილისის მერმა დავით ნარმანიამ დადებითად შეაფასა „თბილსერვის ჯგუფის“ მუშაობა, რაც, მისი თქმით, კომპანიაში მენეჯმენტის მოწესრიგების შედეგია. როგორც დავით ნარმანიამ აღნიშნა, დასუფთავების სამსახურისთვის არსებული ტექნიკა საკმარისია, თუმცა, საჭიროა თანამედროვე და განახლებული ტექნიკა.

ინტერესთა გამოხატვაში მონაწილეობის მიღება შეუძლია ყველა დაინტერესებულ იურიდიულ პირს ან იურიდიულ პირთა გაერთიანებას, რომლებიც აკმაყოფილებენ დოკუმენტით განსაზღვრულ მოთხოვნებს.

დაინტერესებულმა პირებმა ინტერესის გამოხატვისას წერილთან ერთად უნდა წარმოადგინონ საფირმო სახელწოდება და მისამართი; ამონაწერი სამეწარმეო რეესტრიდან; იურიდიული პირის წესდების ნოტარიულად დამოწმებული ასლები და კომპანიის რეზიუმე. უცხოური ფირმის შემთხვევაში, ყველა მოთხოვნილი დოკუმენტი ინგლისურ ენაზე წარმოდგენილი უნდა იყოს შესაბამისი ქვეყნის უფლებამოსილი ორგანოს ან პირის მიერ დამოწმებული, ხოლო ქართულ ენაზე ნათარგმნი დოკუმენტაცია – ნოტარიულად დამოწმებული.

ინტერესთა გამოხატვაში მონაწილე ნებისმიერ დაინტერესებულ პირს უფლება აქვს წინადადება წარმოადგინოს შესასყიდი ნაგავმზიდი მანქანებისა და სხვა სპეციალური ტექნიკის როგორც სრულ ჩამონათვალზე, ასევე ცალკეულ ტექნიკაზე.

ინტერესთა გამოხატვის შედეგებს თბილისის მთავრობის განკარგულებით შექმნილი სპეციალური კომისია განიხილავს.